“Apple” korporasiyasının vitse-prezidentləri Fil Şiller, Qreq Josvyak və Den Riççio yeni təqdim olunan “iPhone 7” və “iPhone 7 Plus” smartfonlarında audioqoşulma yerinin qoyulmamasına aydınlıq gətiriblər.“BuzzFeed” portalının verdiyi xəbərə görə, Q. Josvyak 3,5 mm-lik audioqoşulma yerinin yığışdırılmasının səbəbini belə izah edib: “Bu tip audioqoşulma üsulunun 100-dən çox yaşı var. Bununla bağlı son böyük innovasiya 50 il əvvəl həyata keçirilib. Həmin yeniliyin nədən ibarət olduğunu bilirsinizmi? Sadəcə, qoşulma yerini balacalaşdırıblar. O vaxtdan bəri heç nə dəyişməyib. Bu, dinozavrdır. İrəli hərəkət etməyin vaxtı çatıb”.D. Riççio isə bildirib ki, 3,5 millimetrlik audioqoşulma yeri hava ilə doldurulmuş dəlikdən başqa bir şey deyildi və “Apple”ın innovasion yeniliklərinin qarşısında maneə kimi dayanmışdı: “Bizdə hava ilə doldurulmuş bu 50 illik qoşulma yeri var idi. O, smartfonun içərisində çox qiymətli yeri tuturdu”.Vitse-prezidentlər qeyd ediblər ki, audioqoşulma yerindən imtina yüksək tutumlu akkumulyatordan istifadə etməyə, sukeçirməz özəlliyi reallaşdırmağa, eləcə də Home düyməsi üçün “Taptic Engine” funksiyası quraşdırmağa imkan verib.“Biz səsi istifadəçinin qulağına ötürmək üçün daha keyfiyyətli üsul tapdığımız üçün audioqoşulma yerindən vaz keçdik. Bunun rəqəmsal hüquqların (DRM, “Digital Rights Managament”) idarə olunması ilə heç bir əlaqəsi yoxdur”, – deyə F. Şiller əlavə edib.
