Bir həftə sonra – sentyabrın 7-də “Apple” korporasiyası özünün yeni “iPhone 7” smartfonunun rəsmi təqdimatını keçirəcək.Hələlik smartfonun yenilənmiş dizaynını interneti başına götürmüş şayiələr, söz-söhbətlər, iddialar əsasında təsvir etmək mümkündür. Yaponiyanın “Macotakara” bloqu yazıb ki, “iPhone 7” smartfonlarının rəng spektri 5 çalara qədər genişlənəcək. Resurs bildirib ki, qara rənglə bərabər, yeni model qızılı çəhrayı, gümüşü, boz və qızılı çalarlarda olacaq. Qara rəngin daha parlaq olacağı bildirilir.
Xatırladaq ki, yeni smartfonun rəng palitrasının dəyişikliyi barədə hələ bir neçə ay öncə məlumat yayılıb. Çin mənbələri qeyd ediblər ki, “Apple”nin modelləri “Space Gray” çalarını itirəcək və tam olaraq qara rəngdə olacaq. Digər mənbələr isə göy rəngli smartfonun buraxılacağını iddia ediblər.
İstifadəçilərə isə rəsmi təqdimatı gözləmək və smartfonların əslinin necə olacağını görmək qalır.
