‘’Avropanı kəşf et – Azərbaycan’’ proqramı çərçivəsində innovativ layihələr ilə çıxış edən 5 milli startap Budapeştdə yeddi günlük işgüzar səfərdə olub. Proqramın sponsoru bp şirkətidir və İnnovasiyalar Agentliyi, Turan Trade MMC və Startup Campus tərəfindən dəstəklənən layihənin məqsədi Azərbaycan yenilikçilərinin Aİ və Böyük Britaniya bazarlarına rəqabətədavamlı çıxışına imkan yaratmaqdır.
“Avropanı kəşf et – Azərbaycan” proqramının birinci modulu Macarıstana yeddi günlük biznes turu ilə başa çatıb. Birinci modula cari ilin payızında start verilib. 10 həftəlik səriştəlik proqramında iştirak edən startaplar bazarda böyük oyunçularla əlaqələrin qurulması, sənaye mentorları, investorlar və biznes sahibləri ilə bir araya gəlməyin effektiv yollarını öyrəniblər.
Seçilmiş 5 Azərbaycan startapı Budapeştə səfər zamanı Macarıstanda şirkət qurmağın iqtisadi və hüquqi əsasları haqqında geniş məlumat əldə ediblər. Macarıstan bazarı və onun imkanları haqqında dəqiq təsəvvür yaradılması məqsədilə Azərbaycan stratapları ilə yerli şirkətlər, investorlar, startaplar və dövlət qurumları arasında ikitərəfli görüşlər təşkil olunub.
Budapeşt biznes turu vasitəsilə milli startaplar Macarıstan, Almaniya və Böyük Britaniyanın ekosistemləri ilə yaxından tanış olmaqla yanaşı həmçinin, Avropa bazarlarında fəaliyyət coğrafiyalarını genişləndirə biləcəklər.
