İrlandiyanın Məlumatların Mühafizəsi Komissiyası ABŞ-ın “Meta” şirkətini 500 milyondan çox yerli “Facebook” istifadəçisinin məlumatlarını sızdırdığına görə 265 milyon avro cərimələyib. Tənzimləyicinin araşdırması nəticəsində məlum olub ki, şirkət Aİ-nin Ümumi Məlumatların Qorunması Qaydasının (GDPR) tələb etdiyi ciddi təhlükəsizlik məsələlərinə əməl etməyib.
Cəriməyə əlavə olaraq, tənzimləyici “Meta” şirkətinin İrlandiya bölməsinə şirkətin regiondakı fəaliyyətinin qanunlara uyğun olmasını təmin etmək üçün audit yoxlaması keçirməyi tapşırıb. Qeyd edək ki, bu cərimə şirkətlərin illik gəlirinin 4%-ə qədəri məbləğində cərimələr tətbiq etmək imkanını nəzərdə tutan GDPR-nin bütün müddəti ərzində üçüncü ən böyük cəriməyə çevrilib.
Xatırladaq ki,2021-ci ildə dünyanın 100-dən çox ölkəsində “Facebook” sosial şəbəkəsinin 533 milyon istifadəçisinin şəxsi məlumatlarının sızması haker forumlarından birində şəxsi məlumatların yer aldığı məlumat bazası dərc edildikdən sonra məlum olub. Şirkət belə böyük miqyaslı sızmaya səbəb olan zəifliyin 2019-cu ilin ortalarında aradan qaldırıldığını bildirib.
İrlandiya tənzimləyicisinin hökmünün elanından sonra “Meta” şirkətinin sözçüsü bildirib ki, “İstifadəçi məlumatlarının məxfiliyini və təhlükəsizliyini qorumaq şirkətin biznesi üçün əsasdır”. O, həmçinin qeyd edib ki, icazəsiz məlumatların toplanması yolverilməzdir və sosial media nəhənginin siyasətinə ziddir. Həmçinin bildirilib ki, “Meta” yaranan problemlərin həlli üçün gələcəkdə tənzimləyici ilə əməkdaşlığı davam etdirmək niyyətindədir.
