Şayiələr doğru çıxdı: gələn həftə “Google” ilk qatlana bilən smartfonunu “Pixel Fold”-u təqdim edəcək. Hələlik şirkət xarakteristikalarını açıqlamadan yalnız bunu göstərib – tam təqdimat mayın 10-da Google I/O 2023 konfransının açılışı zamanı baş tutacaq.
Google cihazın heç bir xüsusiyyətini açıqlamasa da, smartfonun kifayət qədər böyük xarici displeyini göstərən qısa tizer dərc edib. Cihaz “Samsung Galaxy Z Fold” cihazlarına bənzər şəkildə açılır. Arxa tərəfdəki kamera bloku dizayn baxımından digər Pixel cihazlarına bənzəyir, lakin o qədər də kənara çıxmır.
Aprel ayında ortaya çıxan sızmalar, “Pixel Fold”-un 5,8 düymlük xarici ekrana sahib olacağını, açıldıqda isə 7,6 düymlük ekran təqdim edəcəyini göstərirdi. Batareya ömrü baxımından “Pixel Fold”-un müntəzəm istifadə ilə 24 saata qədər, batareya qənaəti aktiv olduqda isə 72 saata qədər çatdırılması gözlənilir. Onun “Google Tensor G2” prosessoru, çəkisi 283 qram və “qatlana bilən smartfonda ən davamlı menteşə” olacağı bildirilir. Qiyməti isə 1700 dollar olacaq. Müqayisə üçün qeyd edək ki, Samsung Z Fold 4 satışa çıxarılarkən 1799 dollara satılıb.
“Google”-un ilk qatlana bilən smartfonunun keçən il çıxacağı gözlənilirdi, lakin bu, heç vaxt baş vermədi və onun təqdimatı ilə bağlı şayiələr səngimədi. Bunun əvəzinə “Google”, “Android”-ə qatlanan ekranları düzgün idarə etməyi öyrətməyə diqqət yetirdi ki, bu da bu cihazın və yeni Pixel planşetinin istifadəyə verilməsi ilə nəticə verə bilər.
