ABŞ-Azərbaycan Ticarət Palatası, Yüksək Texnologiyalar Parkı və İsrailin ABŞ-ın Nyu-İnqlənd ərazisində Baş Konsulluğunun birgə təşkilatçılığı ilə Azərbaycan startapları üçün kapitallaşma və bazara giriş strategiyalarına dair “Bakı-Boston Startap Veb Konfransı 1.0.” təşkil edilib.
Veb Konfrans çərçivəsində İsrailin Nyu-İnqlənd ərazisində Baş Konsulluğunun İqtisadi məsələlər şöbəsinin direktoru cənab Austin Sadağatpur Yüksək Texnologiyalar Parkının nümayəndələri və parkda fəaliyyət göstərən startaplar ilə birgə bazara giriş strategiyaları və Bostonda israilli bizneslərin uğurları barədə müzakirələr aparılmışdır.
Veb konfrans zamanı startaplar öz fəaliyyətləri haqqında məlumat vermiş və Konsulluğun fəaliyyəti ilə bağlı suallarını vermişdirlər. Eyni zamanda Yüksək Texnologiyalar Parkı tərəfindən startaplara dəstək və mübadilə proqramları haqqında məlumat verilmişdir və bu tip veb konfransların gələcəkdədə davam etdirilməsi məqsədəuyğun hesab edilib.
Məlumat üçün bildirilir ki, Boston şəhəri ABŞ-ın yüksək texnologiyalar üzrə ixtisaslaşmış əsas şəhərlərindəndir. Bu şəhər elmi araşdırmalar və inkişaf (R&D) sahəsində çalışanların sayına görə ABŞ-ın orta göstəricisindən 2 dəfə yarım yüksək nəticəyə malikdir. Boston şəhəri, eyni zamanda, dünya üzrə vençur kapitalının cəlb edilməsinə görə aparıcı sıralardadır.
Müstəqil araşdırmalara görə, israillilərin təsis etdiyi bizneslər Boston və ümumilikdə, Massaçusets ştatının sənayesində əsas aparıcılardandır. Yalnız 2015-ci ildə bu şirkətlər 9.3 mlrd ABŞ dolları həcmində iqtisadiyyata birbaşa gəlir qazandırmışdır. Ştat iqtisadiyyatına ümumi təsirləri isə 18.1 mlrd. ABŞ dolları həcmində ölçülür. 2013-2015-ci illər ərzində bu şirkətlər 1.2 milyard ABŞ dolları həcmində vençur kapital cəlb etməyə nail olmuşlar.
