“Xiaomi” və Çin Dövlət Avtomobil Şirkəti (BAIC) elektrik avtomobillərinin istehsalı ilə bağlı razılığa gələ bilməyib.İndi, insayderlərin fikrincə,”Xiaomi” elektrik avtomobilləri istehsalı üçün öz fabrikini quracaq və ilk avtomobillər çox tezliklə konveyerdən çıxacaq.
NotebookCheck insayderləri şirkətin ilk elektrik avtomobilinin “Tesla” avtomobillərinə bənzər sedan olacağını bildirir. Bununla belə, qiymət daha aşağı olacaq: onun qiymətinin 30 000 dollardan aşağı olacağı gözlənilir, satışın başlanğıcında ən ucuz “Tesla” isə 35 000 dollara başa gələcək (Model 3). O da məlumdur ki, yenilik “Xiaomi Pilot” avtopilotu ilə təchiz olunacaq, lakin enerji ehtiyatı və digər xüsusiyyətlər barədə məlumat yoxdur. Baş direktorun sözlərinə görə, ilk avtomobillər 2024-cü ildə konveyerdən çıxacaq.
“Xiaomi” öz elektromobilinin istehsalına 1 milyard dollardan çox sərmayə qoyub, lakin Çin qanunvericiliyinin sərtləşdirilməsi səbəbindən yeniliyin bazara çıxarılması prosesi səngiyib. Yeni qanunlara əsasən, dövlət kütləvi istehsala icazə verməzdən əvvəl şirkətin maliyyə və texnoloji imkanlarını təsdiq edən sənədləri daha çox yoxlayır. Belə yeniliklər Çinin elektromobil istehsalçılarının bir sıra müflisləşməsindən sonra yaranıb.
