Avtomobil istehsalçısı “Toyota Motor” təchizatçılarından birinin daxili şəbəkəsinə iddia edilən kiberhücum barədə məlumat verdikdən sonra bu gündən Yaponiyada bütün avtomobil istehsalını dayandıracaq.
“Toyota” şirkətin ölkədəki bütün 14 fabrikinin işini dayandıracağını açıqladı. Yapon brendinin nümayəndələri izah ediblər ki, müəssisələrin nə qədər müddətə bağlı qalacağı hələ bəlli deyil. Şirkət hələ də problemi təhlil edir.
“Reuters”-in məlumatına görə, elektron komponentlərin tədarükçüsü təhlükəsizlik problemi ilə üzləşib. Yapon avtomobil istehsalçısına sözügedən hissələri təmin edən Kojima Industries Corp, “kiberhücum kimi bir şey” yaşadığını söylədi.
“Toyota” istehsalın dayandırılması səbəbindən bazara 13 min avtomobil çıxarmaya bilər.
