Yapon avtomobil istehsalçısı yığcam şəhər elektromobili üçün konsept təqdim edib. FT-Me modeli iki nəfər üçün nəzərdə tutulub, dayanacaqda minimal yer tutur və bəzi ölkələrdə Toyota avtomobilinin idarə edilməsi üçün sürücülük vəsiqəsi tələb olunmur.
Elektromobilin uzunluğu 2,5 metrdən bir qədər az, çəkisi isə cəmi 425 kq-dır. Sürət 45 km/saat ilə məhdudlaşdırılıb ki, bu da ona Fransada avtomobillərin Voiture Sans Permis kateqoriyasına daxil olmağa imkan verir. Bu o deməkdir ki, sürücülük vəsiqəsi olmadan 14 və daha yuxarı yaşda olan yeniyetmələr tərəfindən istifadə edilə bilər.
Top Gear-ın məlumatına görə, FT-Me bir dəfə doldurulmaqla ən azı 100 km yol qət etmək gücündədir. Damda quraşdırılmış günəş panelləri gün ərzində avtomobil birbaşa günəş işığına məruz qaldıqda məsafəni 30 km-ə qədər artıra bilər.
Sərnişin oturacağını çıxarsanız, içərisinə uzunluğu 1,6 metrə qədər olan əşyalar yerləşdirə bilərsiniz. Avtomobilin ətrafındakı panoramik mənzərə isə sürücü üçün görmə qabiliyyətini yaxşılaşdırır, şəhər nəqliyyatında park etməyi və naviqasiyanı asanlaşdırır.
Elektrikli avtomobilin buraxılması planları hələ açıqlanmayıb.
