Amerikanın “SpaceX” aerokosmik şirkəti “Starlink” peyk rabitəsindən istifadə edərək uçuş zamanı təyyarənin göyərtəsində simsiz internetə çıxışın təmin edilməsi üçün hava daşıyıcısı ilə ilk müqavilənin imzalandığını elan etdi.
Müqavilə ABŞ-da sərnişinlərin çarter daşınmasını həyata keçirən regional aviaşirkət “JSX” ilə bağlanıb. Müqavilə aviaşirkətin 100 təyyarəsinin “Starlink” terminalları ilə təchiz edilməsini nəzərdə tutur və “Starlink” şəbəkəsinə qoşulan ilk təyyarə bu il uçacaq.
Sövdələşmənin dəyəri açıqlanmayıb. Onun yekunlaşmasından əvvəl iki şirkət arasında bir neçə aylıq danışıqlar aparılıb. Korporativ müştərilərin cəlb edilməsi SpaceX-in strategiyasının əsas elementidir və o, həmçinin Starlink xidmətindən istifadə etməklə planetin ucqar və əlçatmaz regionlarındakı istehlakçıların internetə çıxışını təmin etməyi planlaşdırır.
“Starlink” xidmətləri “JSX” müştərilərinə aviaşirkətin təyyarələrində pulsuz təqdim olunacaq.Şirkət həmçinin açıqlamasında bildirib ki, əlaqə “sistemdə qeydiyyatdan keçməyi və ya köhnə sistemlərlə əlaqəli digər mürəkkəblikləri tələb etməyəcək”. Göründüyü kimi, sistem adi ev Wi-Fi kimi işləməlidir.
2019-cu ildən bəri “SpaceX” aşağı Yer orbitinə 2000-dən çox “Starlink” mikropeykini buraxıb. Şəbəkə hələ tam istifadəyə verilməsə də, şirkət artıq bir neçə ölkədəki müştərilərə ayda 110 dollara genişzolaqlı İnternetə çıxış xidmətləri təklif edir.
