Samsung, keçən il ABŞ-da iFixit ilə əməkdaşlıq edərək başlatdığı özünütəmir proqramını əhəmiyyətli dərəcədə genişləndirdi. Şirkət ilk dəfə olaraq qatlanan smartfonları istifadəçilərin özləri təmir edə biləcəyi qurğular siyahısına əlavə edib – Samsung Galaxy Z Flip 5 və Fold 5. Siyahıya bir sıra yeni qurğular, o cümlədən Galaxy S23, Galaxy Tab S9 və Galaxy Book2 Pro seriyasından bir sıra qurğular əlavə edilib.
Bu ilin əvvəlində Samsung proqramın fəaliyyət göstərdiyi ölkələr siyahısına Cənubi Koreya, Braziliya, Meksika və bəzi Avropa ölkələrini əlavə edib. Özünütəmir proqramı indi Danimarka, Yunanıstan, Macarıstan və Portuqaliya da daxil olmaqla daha 30 Avropa ölkəsini əhatə edəcək.
Proqram istifadəçilərə cihaz hissələrini orijinal avadanlıq istehsalçılarından (OEM) almaq imkanı verir və zədələnmiş komponentləri necə əvəz etmək barədə addım-addım təlimatlar təqdim edir. Kitin qiyməti cihazdan asılı olaraq dəyişir. Məsələn, Samsung Galaxy S22 Ultra-nın ekranı və batareyası olan dəstin qiyməti 240 dollardır.
Proqram Galaxy smartfon sahiblərinə ekranı, arxa qapağı, doldurma portlarını, dinamiki, SİM kart qabını, yan və səs düymələrini dəyişdirməyə imkan verən orijinal hissələrə çıxış imkanı verir.
Öz növbəsində “Galaxy Book” seriyalı noutbukların istifadəçiləri “Samsung” proqramı sayəsində korpusun ön və arxa qapaqlarını, displeyin, akkumulyator, sensor panel, barmaq izi skaneri olan güc düyməsini, rezin ayaqları, ventilyator və dinamikləri müstəqil şəkildə təmir edə biləcəklər.
Samsung bildirib ki, proqramın genişləndirilməsi onun elektron cihaz tullantılarının azaldılması üzrə ümumi strategiyasına uyğundur.
