Bizim Kibertəhlükəsizlik sahəsində ən böyük çatışmazlığımız insan kapitalı ilə bağlıdır.
Bunu Sosial Tədqiqatlar Mərkəzinin Avropa Birliyi və Avropa Şurası ilə birgə tədqiqat layihəsinin nəticələrinin təqdimatı ilə bağlı konfransda çıxışı zamanı Azərbaycan Kibertəhlükəsizlik Təşkilatları Assosiasiyanın sədri Elvin Balacanov bildirib. O, əksər insanların kibercinayətkarlıqla qarşılaşdığını bilmədiyini qeyd edib:
“Ölkələrin qanunvericiliyinə müqayisəli şəkildə baxsaq, görərik ki, kibercinayətlər bizdə ağır yox, az ağır cinayətlər kateqoriyasına aid edilib”.
“Ümumilikdə, vətəndaşların qarşılaşdıqları kibercinayətkarlıq hallarını aidiyyəti qurumlara bildirmə səviyyəsi də qlobal problemlərdəndir. Biz bu istiqamətdə maarifləndirməni artırmalıyıq.
Əlavə olaraq, bildirmək istərdim ki, ölkədə texniki sahədə insan resurslarının yetişdirilməsinə önəm verilir, lakin bu sahənin hüquqi tənzimlənməsi ilə bağlı ekspertlərə də ehtiyac var. Biz ən azından hüquq fakültələrində bu sahədə intensiv ixtisaslaşmaların aparılmasını müşahidə etmirik. Eyni zamanda, ötən il 9 universitetdə tətbiq olunan “İnformasiya təhlükəsizliyi” tədris proqramında bu sahədə də fənnin tədrisinin həyata keçirilməsi ilə bağlı qərar qəbul edildi” – deyə, Elvin Balacanov bildirib.
