Google Pixel smartfonları ilk növbədə kameraları ilə məşhurdur. Məlum olduğu kimi, şirkətin kameraların sınaqdan keçirildiyi və tənzimləndiyi gizli laboratoriyası var. CNET portalının jurnalistləri ona baş çəkə və “piksel” kameraların necə yaradıldığına şəxsən baxa bildilər.
Düzdür, bu, çoxlarının təsəvvür etdiyi kimi laboratoriya deyil, daha çox real dünyanı təqlid edən pavilyona oxşardı. Google insanların adətən smartfonlarından foto və ya video çəkmək üçün istifadə etdiyi şərtləri təkrarlayan müxtəlif otaqlar tikib. Zəruri hallarda tənzimlənə bilsə də, kifayət qədər işıqlandırma olmayan mühitlərə xüsusi diqqət yetirilir. Bütün bunlar “piksel” kameranın müəyyən şərtlərdə necə davrandığını və alqoritmlərdə hansı dəyişikliklərin edilməsi lazım olduğunu başa düşmək üçün edilir.
Eyni zamanda, sınaq qapalı məkanlardan kənarda da keçirilir və açıq havada – şirkətin kampusunda davam edir.
