Kaspersky mütəxəssisləri diqqətləri kibercinayətkarların yeni iPhone modellərinə olan yüksək tələbatdan sui-istifadəsinə çəkir. Onlar müxtəlif bəhanələrlə guya rəsmi ödəniş sistemlərindən və mağazalardan kütləvi saxta elektron poçtlar göndərərək dünya üzrə istifadəçiləri şəxsi məlumatları və pullarını ələ keçirməyə çalışırlar.
Saxta öncədən sifarişlər. Kaspersky mütəxəssisləri rəsmi “Apple Store” mağazasından öncədən sifarişi təsdiq edən saxta elektron məktublar aşkar ediblər. Məktublarda qeyd olunur ki, istifadəçi artıq “iPhone 18 Ultra Pro”nu öncədən sifariş edib və 1000 dollardan yuxarı dəyərdə kriptovalyuta iə ödənişi edib. «Səhv» tranzaksiyanı aradan qaldırmaq üçün e-poçtda istifadəçidən «Apple dəstək xidməti»inə zəng etmək xahiş olunur. Amma, əgər bu zəng edilərsə, fırıldaqçılar həmin zəng müddətində istifadəçinin müxtəlif xidmətlərdən bank hesablarına qədər məlumatlarına daxil olmağa və ya onları müəyyən hərəkətləri etməyə inandırmağa cəhd edə bilərlər.
Guya beynəlxalq ödəniş sisteminin təhlükəsizlik xidmətindən göndərilən elektron məktublar da aşkar edilib — server naməlum cihazdan istifadəçinin hesabına Apple “iPhone 18 Pro”nun öncədən sifarişi üçün 900 dollardan çox məbləğdə köçürmə tələb edən icazəsiz giriş aşkarlayıb. Alışı ləğv etmək üçün alıcıdan əslində fırıldaqçılara məxsus müştəri dəstək nömrəsinə zəng etməsi istənilib.
Hansı rəngdə iPhone olsun? Arzuladığınız “iPhone 18 Pro” rəngi satışa çıxarılmazdan əvvəl onu sifariş etməyi təklif edən və satışa çıxarıldığı gün çatdırılmasını vəd verən e-poçtlar da aşkar edilib. İstifadəçilər bu cür məktublardakı linkə klikləsələr, fırıldaqçılığın qurbanı olmaq riski ilə üzləşirlər.
«Xatırladırıq ki, hətta inandırıcı görünsə belə, istənilən e-poçta qarşı ehtiyatla yanaşmaq və şübhəli mesajlarda göstərilən telefon nömrələrinə heç bir halda zəng etməmək lazımdır. Dəstək xidməti ilə əlaqə saxlamaq lazımdırsa, nömrəni rəsmi veb-saytda özünüz tapın. Həmçinin naməlum göndərənlərdən gələn e-poçtlardakı linklərlə ehtiyatlı olmalı və şübhəli veb-saytlara giriş məlumatlarınızı və ödəniş məlumatlarınızı daxil etməkdən çəkinməlisiniz», — deyə Kaspersky-nin baş spam analitiki Anna Lazaryeva bildirib.
«Təcavüzkarlar hər zaman müxtəlif mövzular ətrafındakı ajiotajdan sui-istifadə edirlər və yeni “iPhone”ların təqdimatı kimi hər bir böyük təqdimat onlara istifadəçiləri aldatmaq üçün yeni imkanlar açır. Digər ölkələrin sakinləri, o cümlədən bu smartfon seriyasının Azərbaycandakı pərəstişkarları da oxşar tələlərlə qarşılaşa bilərlər. Təhlükəsizlik sadə bir qayda ilə başlayır: şübhən yarandıqda dayan və rəsmi kanallar vasitəsilə təkrar yoxla. İstifadəçi səhv etməyə vadar edilməzdən əvvəl cihazlarınıza fişinq saytlarına girişi bloklayacaq etibarlı təhlükəsizlik həlli quraşdırmağın da ziyanı yoxdur», — deyə Kaspersky-nin Azərbaycandakı rəsmi nümayəndəsi Müşviq Məmmədov qeyd edir.
Bu cür hücumlardan qorunmaq üçün Kaspersky mütəxəssisləri istifadəçilərə tövsiyə edirlər:
yalnız göstərilən adı deyil, göndərənin ünvanını da yoxlayın;
şübhəli mesajlardakı linklərə klikləməyin və ya faylları yükləməyin;
şübhəli veb-saytlarda hesab məlumatlarınızı daxil etməyin və ya ödəniş etməyin;
rəsmi resurslarda gözlənilməz e-poçtun göndəricisinin əlaqə məlumatlarını axtarın və mesajın həqiqətən göndərilib-göndərilmədiyini yoxlayın;
istifadə olunan bütün cihazlara Kaspersky Standard kimi təhlükəsizlik həlli quraşdırın ki, fişinq və saxta veb-saytlara girişin qarşısını almaq imkanı əldə edəsiniz.
