Bu gün Bakı Konqres Mərkəzində 74-cü Beynəlxalq Astronavtika Konqresinin təntənəli açılış mərasimi keçirilib. 50 ildən sonra Bakı ikinci dəfə Beynəlxalq Astronavtika Konqresinin həyəcan və sevincini yaşayıb.
Azərbaycan Respublikasının Prezidenti İlham Əliyev, birinci xanım Mehriban Əliyeva və oğulları Heydər Əliyev tədbirdə iştirak ediblər.
Dövlət başçısı Konqresin açılış mərasimində çıxış edib.
Daha sonra tədbir iştirakçılarını salamlayan Beynəlxalq Astronavtika Federasiyasının (BAF) prezidenti Kley Mouri 50 il sonra konqresin təkrar Bakıda keçirilməsindən məmnunluğunu ifadə edib və bunun Azərbaycan kosmik sənayesinin tarixində önəmli hadisə olduğunu qeyd edib.
Açılış mərasimində 3200-dən artıq qonaq iştirak edib. Onların sırasında qlobal kosmik ictimaiyyətin nüfuzlu nümayəndələri, ABŞ, Çin, Türkiyə, Səudiyyə Ərəbistanı, İsrail, Birləşmiş Ərəb Əmirlikləri, Hindistan, Yaponiya, İtaliya, Böyük Britaniya, Özbəkistan, Qırğızıstan, Türkmənistan və Qazaxıstanın kosmik agentliklərinin, şirkətlərinin təmsilçiləri, Beynəlxalq Telekommunikasiya İttifaqı, BMT-nin Kosmik fəzanın sülh məqsədləri üçün istifadəsi üzrə komitəsi, İslam Dünyası Təhsil, Elm və Mədəniyyət Təşkilatının (ICESCO) rəhbər heyəti, həmçinin Türkiyənin “Baykar” şirkətinin İdarə Heyətinin sədri Selçuk Bayraktar olub.
***
Açılış mərasimində Azərbaycanın tarix və mədəniyyətini, görkəmli elm xadimlərini, həmçinin 50 il əvvəl Azərbaycanın ev sahibliyi etdiyi 24-cü Beynəlxalq Astronavtika Konqresini əks etdirən videoçarx nümayiş olunub.
Növbəti videoçarxda Çin Kosmik Agentliyinin Bakı Konqresinin bir xatirəsini fəzaya göndərməsi əksini tapıb: Ulu Öndər Heydər Əliyev və Azərbaycan Prezidenti İlham Əliyevin 1973-cü ildə konqresdə çəkilmiş fotoşəkili Çinin kosmik stansiyasına aparılıb. Çin kosmonavtları Azərbaycanın dövlət başçısı və tədbir iştirakçılarını təbrik edib, konqresin işində uğurlar arzulayıblar.
Kosmosa göndərilmiş həmin tarixi foto, həmçinin 1973-cü il Bakı Konqresini əks etdirən digər şəkil, marka və aksesuarlardan ibarət xüsusi xatirə lövhəsi Çinin kosmik ictimaiyyəti adından Azərbaycan Respublikasının Prezidenti İlham Əliyevə təqdim edilib.
Açılış mərasimində Beynəlxalq Kosmik Stansiyanın korporativ videoçarxı da nümayiş olunub. Tanınmış kosmonavtlar iştirakçılara konqresin işində uğurlar arzulayıblar.
***
Tədbir çərçivəsində, həmçinin Beynəlxalq Astronavtika Federasiyasının mükafatları təqdim olunub.
“SpaceX” şirkətinin qurucusu İlon Mask kosmos sahəsindəki nailiyyətlərinə görə Beynəlxalq Astronavtika Federasiyasının “Dünya kosmos mükafatı”na layiq görülüb. Mükafat “SpaceX” şirkətinin kommersiya üzrə baş direktoru Stefani Bednarekə təqdim edilib. Qeyd edək ki, İlon Mask Beynəlxalq Astronavtika Konqresinə oktyabrın 5-də virtual olaraq qoşulacaq.
“Komandalar üçün dünya kosmos mükafatı” isə məşhur “James Webb” Kosmik Teleskopunun ərsəyə gəlməsində rolu olan ABŞ (NASA), Avropa Kosmik Agentliyi və Kanada Kosmik Agentliyi mütəxəssislərindən ibarət komandaya təqdim olunub.
Tədbirdə həmçinin NASA administrasiyasının Elm üzrə keçmiş köməkçisi Tomas Zurbuçeniyə Beynəlxalq Astronavtika Federasiyasının Beynəlxalq korporativ sahədə mükəmməllik mükafatı təqdim edilib.
Qeyd edək ki, bu mükafatlara kosmik elm, kosmik texnologiya, kosmik tibb, kosmos hüququ və ya astronavtika sahəsində tərəqqiyə müstəsna xidmət göstərənlər layiq görülür.
***
Açılış mərasimində konqresin fəxri qonağı, nüfuzlu yazıçı və tarixiçi, professor Yuval Noah Harari çıxış edib. Natiq kosmosun bəşəriyyətin inkişafı üçün yaratdığı geniş imkanlar barədə fikirlərini səsləndirib.
***
Açılış mərasimində bədii kompozisiya, musiqi və kosmos elementlərini özündə birləşdirən zəngin proqram təqdim olunub.
Tədbirin keçirildiyi “Auditorium” zalında “Süd yolu”nu əks etdirən rəngarəng buz kanatlar quraşdırılıb, tavandan asılmış elektron platformalarla kosmosdan ulduz seli simulyasiya edilib.
Proqram Azərbaycan mədəniyyətinin zənginliyi və unikallığını nümayiş etdirib.
Qonaqlara dahi Azərbaycan şairi və mütəfəkkiri Nizami Gəncəvinin (1141-1209) kosmosla bağlı fəlsəfi görüşləri təqdim olunub.
Bundan əlavə, kainatın sirlərinin daşıyıcısı hesab edilən Butanın Qız Qalasından milli xalça ornamentlərinə keçidini, Qarabağın rəmzi olan Xarıbülbülün kosmosa səyahətini, Qarabağın kürən atlarını əks etdirən qrafik kompozisiya nümayiş etdirilib.
Tədbirin ən maraq doğuran hissələrindən biri Süni intellektlə idarə olunan robot vasitəsilə təqdim edilən innovativ inkişafla bağlı uğur hekayəsi olub.
Sonda kainatın 4 əsas elementi – su, od, hava və torpaq 4 janrın – caz, rok, klassik musiqi və muğamın sintezi ilə canlandırılıb.
Caz kompozisiyasını ispan müğənni Buika, roku Azərbaycan ifaçısı Aslan Nuri, klassik musiqini Azərbaycanın Əməkdar artisti Nərgiz Kərimova, muğamı Azərbaycanın Xalq artisti Alim Qasımov ifa edib.
Qeyd edək ki, “Qlobal çağırışlar və imkanlar: kosmosa şans verək” şüarı altında başlayan 74-cü Beynəlxalq Astronavtika Konqresində iştirak üçün 120-dən çox ölkədən 5000-dən artıq nümayəndə qeydiyyatdan keçib.
Tədbir oktyabrın 6-dək davam edəcək.
