Fevralın 23-də Rəqəmsal İnkişaf və Nəqliyyat Nazirliyi yanında Kosmik Agentliyində (“Azərkosmos”) beynəlxalq “ActInSpace” kosmik texnologiyalar üzrə hakatonunun Qran-Pri mükafatının qalibi Azərbaycan-Fransız Universitetinin tələbələrindən ibarət NEXUS komandası ilə görüş keçirilib.
NEXUS komandası ötən il Azərkosmosun tərəfdaşlığı ilə Bakıda keçirilən “ActinSpace 2022” hakatonunun qalibi olub. Görüşdə NEXUS komandası beynəlxalq hakatonda təqdim etdikləri layihəyə hazırlıq mərhələsi, irəli sürülən ideyanın inkişafı və məhsula çevirmək imkanları haqqında danışıblar.
“ActInSpace” Fransa Milli Kosmik Araşdırmalar Mərkəzi (CNES) və Avropa Kosmik Agentliyi (ESA) tərəfindən təşkil olunan, kosmik texnologiyaların cəmiyyət üçün istifadəsini nəzərdə tutan beynəlxalq hakatondur. Bu il yarışmada 35 ölkənin 66 şəhərini təmsil edən 1000-ə yaxın komanda iştirak edib.
Qalib komanda kosmosun imkanları ilə daha yaxından tanış olmaq üçün bu il Bakıda keçiriləcək Beynəlxalq Astronavtika Konqresinə dəvət olunub. Görüş əsnasında Azərkosmos və Azərbaycan-Fransız Universiteti arasında gələcək əməkdaşlıq perspektivləri barədə UFAZ rəsmiləri ilə fikir mübadiləsi aparılırb.
Kosmik Agentliyin sədri Saməddin Əsədov qalib komandanı və UFAZ universitetinin əməkdaşlarını təbrik edərək onlara gələcək fəaliyyətlərində uğurlar arzulayıb. Vurğulanıb ki, Azərbaycanda gənclərin kosmos sahəsindəki hazırlığının yüksək saxlanılması daim diqqət mərkəzindədir və bundan sonra da yerli və beynəlxalq yarışlarda gənclərin iştirakı dəstəklənəcək.
