İstanbulda İslam Əməkdaşlıq Təşkilatının İqtisadi və Ticarət Əməkdaşlığı üzrə Daimi Komitəsinin (COMCEC) 33-cü iclası çərçivəsində nazirlər toplantısı işə başlayıb.
AZƏRTAC xəbər verir ki, iclasda Azərbaycanı nəqliyyat, rabitə və yüksək texnologiyalar nazirinin müavini Elmir Vəlizadənin rəhbərlik etdiyi nümayəndə heyəti təmsil edir.
Əvvəlcə ”Qurani-Kərim”dən ayələr oxunub.Rəsmi açılış mərasimində Türkiyə Prezidenti Rəcəb Tayyib Ərdoğan, İslam Əməkdaşlıq Təşkilatının baş katibi Yousef bin Ahmed Al-Othaimeen, İslam İnkişaf Bankı Qrupunun prezidenti Bandar Hajjar və üzv ölkələrin region təmsilçiləri çıxış ediblər.
Çıxışçılar İƏT-ə üzv olan ölkələr arasında əlaqələrin daha da genişləndirilməsi, islam ölkələrinin qarşılaşdıqları problemlərin həll edilməsi, təbii sərvətlərdən və coğrafi mövqelərdən səmərəli istifadə edilməsi yollarına dair fikir və mülahizələrini bölüşüblər.
Toplantı ayrı-ayrı panellərdə işini davam etdirəcək.
