Apple bu il qiyməti 599 dollardan başlayan yeni büdcəli MacBook noutbukunu təqdim etməyi planlaşdırır.Bəzi komponentlərin kütləvi istehsalına 2025-ci ilin üçüncü rübünün sonunda başlanılacaq, noutbukların yığılmasına isə ilin sonuna qədər başlana bilər.
MacBook-un yekun yığılmasının dördüncü rübdə Quanta fabriklərində baş tutacağı, noutbukun isə 2025-ci ilin sonu və ya 2026-cı ilin əvvəlində satışa çıxarılacağı gözlənilir ki, bu da Ming-Chi Kuo-nun proqnozuna uyğundur. İyun ayında o, Apple-ın 13 düymlük ekrana və A18 Pro çipinə malik ucuz MacBook-u buraxmaq planlarını açıqlamışdı. Bu noutbuk iPhone-da istifadə edilən eyni çip əsasında işləyən ilk Mac olacaq. Əvvəllər bütün Mac-lər daha çox nüvəyə, artan yaddaşa və xarici displeylər üçün təkmilləşdirilmiş dəstəyə malik M seriyalı çiplərlə təchiz edilmişdi. Qeyd edək ki, A18 Pro çipi Thunderbolt-u dəstəkləmir, ona görə də yeni MacBook çox güman ki, USB-C portları ilə təchiz olunacaq.
Ming-Chi Kuonun sözlərinə görə, yeni məhsul ultra nazik və yüngül korpusa sahib olacaq və gümüş, mavi, çəhrayı və sarı rənglərdə təklif olunacaq.
DigiTimes-in məlumatına görə, yeni MacBook-un qiyməti 599 dollardan 699 dollara qədər olacaq. Müqayisə üçün qeyd edək ki, ABŞ-da 13 düymlük MacBook Air-in qiyməti 999 dollardan başlayır (və ya Apple-ın tələbələr üçün endirimi nəzərə alınmaqla 899 dollardan).
Analitiklərin proqnozlarına görə, büdcə MacBook-un illik tədarükü 5-7 milyon ədədə çata bilər ki, bu da ümumi MacBook satışlarını ildə 17-18 milyon ədəddən 30-40% artıra bilər.
