“Huawei Azərbaycan” şirkəti AZƏRTAC və digər tərəfdaşlarının dəstəyi ilə “Gözəl Azərbaycan” layihəsini həyata keçirir. “Gözəl zəkalar”, “Gözəl mədəniyyət”, “Gözəl insanlar” və “Gözəl təbiət” adlı dörd hissədən ibarət olan bu uzunmüddətli sosial layihənin məqsədi Azərbaycanı bütün dünyada daha çox tanıtmaqdır. Layihə Bakı və Azərbaycanın müxtəlif regionlarını əhatə edir.Sentyabrın 7-də “Gözəl təbiət” layihəsi çərçivəsində təşkil edilən müsabiqənin qalibləri mükafatlandırılıb. “Gözəl təbiət” layihəsinin məqsədi Azərbaycan təbiətinin zənginliyini, fərqliliyini və gözəlliyini nümayiş etdirməkdir.
Tədbirdə “Huawei Azərbaycan”ın baş icraçı direktoru Çao Zejun deyib ki, bu layihə Azərbaycan və Çin mədəniyyətlərini birləşdirmək üçün təşkil edilib. Bu layihə ilə Azərbaycanın gözəl təbiəti, tarixi, mədəniyyəti və mehriban insanları barədə dünyanı məlumatlandırmaq istəyirik.
Qeyd edib ki, müsabiqənin iştirakçıları “Facebook” sosial şəbəkəsi vasitəsilə fotolarını göndəriblər və ən çox bəyənilən üç şəkilin sahibi qalib olub.
Sonra müsabiqənin qalibləri — Xəqani Səlimov, İbrahim Əliyev və İlkin Məmmədli şirkət tərəfindən mükafatlandırılıb.
