Google-un bu yaxınlarda Epic Games-ə qarşı məhkəmədə uduzması Android platformasını alternativ tətbiq mağazalarına açacaq. Xbox da yaxın gələcəkdə öz xidmətini təqdim etməyi planlaşdırır.
Yada salaq ki, Amerikalı hakim Google-a üçüncü tərəf proqram mağazalarına üç il müddətində (1 noyabr 2024-cü ildən 1 noyabr 2027-ci ilə kimi) bərabər şərtlər təqdim etməyi və tərtibatçıları Google Play Billing ödəniş sistemindən istifadə etməyə məcbur etməməyi əmr etmişdi.
Xbox prezidenti Sara Bond mikrobloqunda vəziyyəti şərh edib. Onun sözlərinə görə, məhkəmənin ABŞ-da Google-un mobil mağazasını açmaq qərarı istifadəçilərə daha çox çeviklik və seçim azadlığı təmin edəcək.
Video Games Chronicle jurnalistlərinin qeyd etdiyi kimi, Bondun bəyanatından Xbox proqramında hansı oyunların alına biləcəyi və funksiyanın ABŞ-dan kənara yayılıb-yapılmayacağı bəlli deyil.
Bu arada Google artıq məhkəmənin qərarından apellyasiya şikayəti vermək planlarını açıqlayıb. Şirkətin fikrincə, bu, istifadəçilərin təhlükəsizliyini və məxfiliyini təhlükə altına salacaq, tərtibatçıların proqramları təşviq etməsini çətinləşdirəcək və rəqabəti zəiflədəcək.
Əvvəllər bildirilmişdi ki, Microsoft müxtəlif Xbox studiyalarının layihələrini və oyundaxili elementləri özündə birləşdirəcək mobil proqramlar mağazası üzərində işləyir. Brauzer versiyasının sınaqlarına avqust ayında başlanılıb.
