“WhatsApp” messenceri tezliklə Avropa İttifaqında digər messencerlərlə mesaj mübadiləsini mümkün edəcək. “WhatsApp”ın texniki direktoru Dik Brauer “The Wired” nəşrinə verdiyi müsahibədə bunun yalnız müqavilələr imzalanacağı və təhlükəsizlik protokollarına əməl ediləcəyi təqdirdə mümkün olacağını bildirib.
WhatsApp bu addımı Aİ-də qüvvəyə minən Rəqəmsal Bazarlar Aktına uyğun olaraq atıb. WhatsApp-ın digər xidmətlərlə inteqrasiyası birbaşa mətn və səsli mesajlar, videolar, şəkillər və fayllar mübadiləsinə kömək edəcək. Yəni Telegram, Signal, iMessage, Google Messages və digər ani mesajlaşma proqramlarından birbaşa WhatsApp-a yaza bilərsiniz.
Messencer hesab edir ki, bu cür qarşılıqlı əlaqə Siqnal Protokoluna əsaslanan vahid şifrələmə standartını tələb edəcək, lakin messencerlər WhatsApp təhlükəsizlik standartlarına cavab verdiyini sübut edə bilsələr, şirkət digər təhlükəsizlik protokollarını nəzərdən keçirməyə hazırdır. Həmçinin, belə bir mübadilə üçün Meta ilə müqavilə imzalamaq lazım gələcək, onun təfərrüatları mart ayında açıqlanacaq.
