AZTECH-bu dəfəki istiqamət doğma LAÇIN!
Noutbuklar, kompüterlər və aksesuarların satışı ilə məşğul olan “Azerbaijan Technologies” şirkəti (AZTECH əmtəə nişanı) Laçının 2 nömrəli tam orta məktəbinə 30 ədəd noutbuk hədiyyə edib.
Bu barədə ICTinfo.az şirkətə istinadən xəbər verir.
«İşğaldan azad edilmiş Qarabağda 31 il sonra Laçında bu ilin sentyabr ayında ilk zəng çalındı və 2 nömrəli tam orta məktəbdə yeni tədris ilinə start verildi. İşğaldan azad olunmuş torpaqlarda bərpa işlərində AZTECH şirkətinin də payı olsun deyə, 2 saylı orta məktəbi kompüter avadanlığı ilə təmannasız olaraq tam şəkildə təchiz etdi. Belə ki, LENOVO brendinə məxsus yeni nəsil 30 ədəd noutbuk Laçındakı məktəbə 01.11.2023-cü il tarixində hədiyyə edildi»,- şirkətin məlumatında deyilir. 
AZTECH hədiyyələrini Laçına özü çatdırıb. Tədbirdə şirkətin rəhbərliyi, məktəbin məsul rəhbər şəxsləri və Azərbaycan Prezidentinin Şərqi Zəngəzur iqtisadi rayonuna daxil olan Laçın rayonunda xüsusi nümayəndəliyinin səlahiyyətli şəxsi iştirak ediblər. Məktəb şagirdləri noutbukları elə yerindəcə sınayıb, müxtəlif proqramlarda işləyiblər.
İşğaldan azad olunmuş torpaqlarda bu AZTECH şirkətinin sosial-məsuliyyət yönümlü ilk layihəsidir, davamı mütləq olacaqdır:
«Ümid edirik ki, nəinki Laçında, işğaldan azad olunmuş bütün torpaqlarımızda tezliklə digər yeni tədris ocaqları, mədəniyyət və gənclər mərkəzləri istifadəyə veriləcək. Doğma torpaqlarda daima sülh və firəvanlıq bərqərar olacaqdır!»
