«Microsoft» populyar «Python» proqramlaşdırma dili üçün dəstəyi özünün xüsusi «Excel» elektron cədvəl redaktoruna inteqrasiya edib. Bu, qrafiklər və «Python» kitabxanalarından istifadə edərək cədvəllərdə verilənlərlə işləməyə, onları təhlil etməyə və vizuallaşdırmağa imkan verir.
“Siz Python-u birbaşa Excel-də açaraq tanış Excel mühitində təkmil məlumat təhlilini həyata keçirə bilərsiniz. Əlavə konfiqurasiya və ya quraşdırma tələb olunmur. Daxili Excel və Power Query alətlərindən istifadə etməklə siz asanlıqla Excel-in Python iş axınlarına xarici məlumatları daxil edə bilərsiniz”-«Microsoft» açıqlamasında qeyd edilib.
Yeni funksiyanı həyata keçirmək üçün şirkət aparıcı korporativ səviyyəli Python repozitoriyası olan Anaconda ilə əməkdaşlıq etdi.
Python hesablamaları Microsoft Cloud-da aparılır, bundan sonra nəticələr Excel cədvəlinə qaytarılır. Hər kəs Python məlumatlarına əsaslanan düsturlar, pivot cədvəllər və diaqramlar yarada, həmçinin istilik xəritələri və s. kimi vizuallaşdırmalar yaratmaq üçün diaqram kitabxanalarından istifadə edə bilər.
Excel-də Python artıq beta kanalında Microsoft 365 Insider üçün açıq test kimi mövcuddur. Əvvəlcə yenilik Windows ilə məhdudlaşacaq, daha sonra digər platformalarda da görünəcək. Bütün funksiyalara daxil olmaq üçün ödənişli lisenziya tələb olunur.
