25-27 aprel tarixlərində Özbəkistanın paytaxtı Daşkənd şəhərində keçirilən “Kosmik texnologiyalar konfransı”nda iştirakımızın birinci gününü uğurla tamamladıq.
Regionun kosmik agentlikləri və beynəlxalq kosmik ictimaiyyətin maraqlı tərəflərinin təmsil olunduğu bu tədbirdə Azərkosmosun sədri Saməddin Əsədov “Regional əməkdaşlıq, beynəlxalq investisiya və kosmik sənayenin davamlı inkişafı”na həsr olunmuş sessiyada çıxış edib. O, ölkəmiz üçün kosmik sahənin əhəmiyyətindən, son 10 il ərzində Azərbaycanın kosmik sahədəki fəaliyyəti, peyklərin resursları vasitəsilə Avropa, Afrika və Mərkəzi Asiya ölkələrində həyata keçirilən layihələr və yeni imkanlardan bəhs edib.
Tədbirdə qonaqlara bu il paytaxtımızda keçiriləcək 74-cü Beynəlxalq Astronavtika Konqresinin nəinki Azərbaycan, regionda kosmik sahənin inkişafına stimul olacağı bildirilib. Görüş vasitəsilə Türk dövlətlərinin kosmik ictimaiyyəti, o cümlədən gəncləri Bakıda keçiriləcək Konqresə dəvət olunub.
