«Mercedes-Benz» şirkəti özünün qabaqcıl elektrik krossoveri «EQS SUV»-ni təqdim etdi. Avtomobilin 600 km-dən çox məsafəni bir nəfəsə qət edə bilən 5 və 7 yerlik versiyaları satışa çıxarılacaq.Gözlənilir ki,»Mercedes»-dən gələn yenilik «Tesla Model X» və «BMW iX» kimi digər premium elektrik krossoverlərinin tam hüquqlu rəqibinə çevriləcək.
Təqdim olunan elektromobil bir çox cəhətdən EQS sedanının daha kütləvi versiyasıdır. Ön panelin bütün eni boyunca 56 düymlük ekran yerləşdirilib (iş panelində ayrıca 12,5 düymlük displey olan versiya da mövcud olacaq). EQS SUV avtomobilin bir düym qalxmasına imkan verən Airmatic pnevmatik asqı aldı.
Alıcıların elektrik stansiyasının konfiqurasiyası üçün iki variant olacaq. EQS 450+ bazası 355 at gücü və 568 Nm fırlanma anı hasil edən elektrik mühərriki ilə arxa ötürücülü modeldir. EQS 450 4Matic tam ötürücülü konfiqurasiya cəmi 536 at gücü və 858 Nm fırlanma anı verən iki güc qurğusundan istifadə edir. İstehsalçının sözlərinə görə, Torque Shift texnologiyası «arxa və ön elektrik mühərrikləri arasında fırlanma momentinin pilləsiz paylanmasını» təmin edir.
EQS sedanı ilə SUV arasındakı əsas fərq ondan ibarətdir ki, hər iki model eyni 3200 mm təkər bazasında qurulsa da, sonuncu daha massivdir. Eyni zamanda, krossover sedandan demək olar ki, 20 sm hündürdür. 5130 × 1955 × 1727 mm ölçüləri ilə təqdim olunan EQS SUV hələ də 2022 Mercedes GSL sinifindən daha qısa və nazikdir. EQS sedanından başqa bir fərq torpaq yollarda və yamaclarda sürmək üçün optimallaşdırılmış Offroad sürmə rejiminə dəstəkdir.
İstehsalçı yeniliyin bəzi xüsusiyyətlərini, o cümlədən 100 km/saat sürətlənmə müddətini açıqlamayıb. Sedan kimi, EQS SUV də Plug and Charge funksiyasına malikdir, yəni onu ABŞ və Avropadakı müxtəlif ictimai enerji doldurma stansiyalarından doldurma xidmətinə abunə olmaq kimi əlavə addımlara ehtiyac olmadan doldurmaq olar. İstehsalçıya görə, 110 kVt və ya daha yüksək DC stansiyasından istifadə edərkən akkumulyator 31 dəqiqə ərzində 10%-dən 80%-ə qədər doldurula bilər (265 kVt-a qədər şarj dəstəklənir).
İstehsalçı EQS yolsuzluq avtomobillərinin tədarükünün başlanmasının vaxtını, eləcə də elektromobilin pərakəndə satış qiymətini açıqlamayıb. Onun qiymətinin 110-130 min dollar arasında olacağı güman edilir.
