Cənubi Koreya nəhəngi «Samsung» şirkəti xüsusi «Pokemon Edition» ilə «Galaxy Z Flip3» smartfonunu buraxmağa hazırlaşır. Elastik displeylə təchiz edilən qurğu aprelin 24-də xüsusi konfiqurasiya və dizaynda satışa çıxarılacaq.
Yenilik məhdud sayda istehsal olunacaq. Paketə qırmızı qutu, tematik stikerlər və «Pokemon» üslubunda olan digər aksessuarlar daxildir. Şəkildə smartfonun özü pikaçu təsvirləri olan stikerlə qara rəngdə göstərilib.
Texniki baxımdan, yenilik Galaxy Z Flip3-ün adi versiyasından heç də fərqlənməyəcək. Bu, çevik 6,7 düymlük Dynamic AMOLED 2X ekran deməkdir. Panel 1080 × 2640 piksel təsvir ölçüsünə, 120 Hz yeniləmə sürətinə və 1200 nit parlaqlığa malikdir.
Səkkiz nüvəli Qualcomm SM8350 Snapdragon 888 5G prosessorundan və Adreno 660 qrafik sürətləndiricisindən istifadə olunur.RAM-ın həcmi 8 GB, fleş yaddaşın tutumu 128 və ya 256 GB-dır.
Əsas kamera iki 12 meqapiksel moduldan ibarətdir. Bundan əlavə, 10 meqapiksellik selfi kamerası var. Avadanlığa yan tərəfə quraşdırılmış barmaq izi skaneri daxildir.
Pokemon Edition Galaxy Z Flip3 versiyasının qiyməti və planlaşdırılan buraxılış həcmi haqqında hələlik məlumat yoxdur.
