Myvideo.az internet televiziya platformu qısa müddət ərzində Azərbaycanın ən məşhur internet resurslarından birinə çevrilib.Ölkədə ilk dəfə olaraq telekanalların yayımında arxivləşdirmə sistemi müvəffəqiyyətlə tətbiq olunub. Qısa zamanda tətbiq olunan sözügedən sistem istənilən telekanalın 10-günlük arxivini rahatlıqla izləməyə imkan verir. Statistika göstərir ki, Myvideo.az vasitəsilə telekanalları izləyən istifadəçilər sayı durmadan artmaqdadır.
Myvideo.az Azərbaycan telekanallarının internet vasitəsilə qlobal müstəvidə yayımını təşkil etməkdə məqsədi Azərbaycan Respublikasının Rabitə və Yüksək Texnologiyalar Nazirliyinin bu istiqamətdə apardığı dövlət strategiyasını dəstəkləməkdir. Əlbəttə, bu gün Azərbaycan telekanallarını mili peykimiz vasitəsilə izləmək mümkündür. Bu, həqiqətən də Azərbaycanın informasiya blokadasının yarılması istiqamətində atdığı son dərəcə mühüm və strateji bir addımdır. Lakin qlobal texnoloji trendlərin təhlili göstərir ki, sistemli uğur üçün internetə də xüsusi diqqət verilməlidir. Çünki son illər televiziya tamaşaçıları tədricən internetə miqrasiya edir və videoməzmunu, o cümlədən telekanalları internet vasitəsilə izləməyə üstünlük verir. Buna görə də Myvideo.az-ın təqdim etdiyi imkan Azərbaycanla maraqlanan hər bir internet istifadəçisinın maraqlarına cavab verir. Bununla yanaşı Myvideo.az Azərbaycan telekanallarının xarici ölkələrin kabel televiziya paketlərinə qoşulmasına, həmçinin milli bədii və sənədli filmlərin xarici telekanallarda göstərilməsinə yardım edir.
Azərbaycan televiziyasının əsas problemlərindən biri onun ölkədaxili formatda inkişafına üstünlük verilməsidir. Əfsuslar olsun ki, uzun müddət ərzində Azərbaycan telekanalları öz inkişaflarını beynəlxalq müstəvidə görmürdülər. Bu da birbaşa və dolayısı yolla onların rəqabətə davamlılığına, dünya standartlarına uyğun verilişlərin və digər teleməzmunun işlənib hazırlanmasına təsir edirdi. Qlobal televiziya trendlərini anlayan menecerlərimizin sayı da məhduddur. Myvideo.az və dövlətin bu sahəyə göstərdiyi dəstək, beynəlxalq arenaya çıxış üçün yaratdığı münbit şərait telekanallarımızın yeni inkişaf mərhələsinə adlaması üçün imkan verəcək.
Azərbaycanın maraqları naminə və gənclərin internet sahəsindəki biliklərinin artırılması məqsədilə yeni-yeni xidmətlər əlavə olunur. İnternet televiziyasının həvəskar kino və sənədli filmlər yönündəki yaradıcılıqda böyük potensialı vardır. Çünki hər bir insan, hətta smartfondan və yaxud sadə videokameradan istifadə edib maraqlı mövzularda müxtəlif filmlər hazırlayaraq internet vasitəsilə tamaşaçıların rəğbətini qazana bilər. Gəncləri məhz bu istiqamətdə həvəsləndirmək üçün Bakıda «Smart Film» festivalının keçirilməsi planlaşdırılıb. Festival iştirakçıları Myvideo.az tərəfindən gətiriləcək peşəkar montajçı və səs rejissorların xidmətindən bəhrələnə biləcək. Festival çərçivəsində Hollivud prodüsserlərilə əməkdaşlıq təcrübəsinə malik Gürcüstan və Ukrayna rejissorlarının seminarları da təşkil ediləcək. Bununla da ilk dəfə olaraq Bakıda beynəlxalq onlayn kino və telefestivalların keçirilməsi kimi olduqca maraqlı bir beynəlxalq təşəbbüs də irəli sürülür. Sözügedən layihənin müvəffəqiyyətlə reallaşdırılması üçün artıq beynəlxalq festivalların təşkilatçıları ilə danışıqlara da start verilmişdir. Bu təcrübələr Azərbaycan üçün son dərəcə əhəmiyyətlidir.
İnternetdə telelayihələrin yaradılması daha ucuz başa gəldiyi üçün əsas fəaliyyətlərin məhz bu istiqamətdə olmasını proqnozlaşdırmaq olar. Yaxın illər ərzində Azərbaycanın internet məkanında 10-20 internet-kanalın yaranmasının şahidi olacağıq. Müəllif hüquqlarının qorunması ilə baglı tendensiyanın gücləndirilməsi sayəsində milli kontentə olan tələbat artacaq. Əminliklə demək olar ki, yaxın illər ərzində Azərbaycanın teleməkanını yeni inkişaf mərhələsi gözləyir.Myvideo.az milli internet-telekanalları inkişaf etməyə şövqləndirmək məqsədilə xüsusi müsabiqənin keçirilməsini planlaşdırır. Müsabiqənin məqsədi Azərbaycan internet məkanının video-kontent sahəsində startapların dəstəklənməsi, milli video-kontentin yaradılması, gənclərin sahibkarlıq sahəsində təşəbbüskarlıqlarının stimullaşdırılması, televiziyada gənc mütəxəssislərin təkmilləşməsi üçün motivasiya sisteminin tətbiqidir. Qeyd etmək lazımdır ki, müsabiqə çərçivəsində video-kontent sahəsində internet-layihələrin yaradılmasına dəstək göstərmək üçün ilk dəfə olaraq Azərbaycanda xüsusi təlimlərin keçirilməsi də planlaşdırılır. Təlimlər çərçivəsində müsabiqə iştirakçıları öz ideyalarını daha da təkmilləşdirmək və aparıcı mütəxəssislərin yardımılə öz biliklərini daha da artırmaq imkanını əldə edəcəklər.
Son illər televiziya sahəsindəki inkişafın çox dinamik olduğu üçün gələcək trendləri izləmək və onları vaxtında tətbiq etmək uğurun əsası hesab olunur. Bunu nəzərə alaraq Myvideo.az müasir rəqəmli televiziyaya həsr olunmuş müxtəlif beynəlxalq konfranslarda və sərgilərdə tez-tez iştirak edir. Bu, ən optimal texnlologiyanı seçməyə, yaxın gələcək üçün televiziyanın inkişaf vektorunu müəyyənləşdirməyə, Myvideo.az-ın növbəti addımlarını planlaşdırmağa yardım edir. Son 5 ildə televiziya sahəsində texnologiyaların tətbiqi bu sahəni olduqca dinamik etmişdir. İnternet və mobil texnologiyalar televiziyada olan dəyişiklikləri davam etdirəcəkdir.
İnternetdə teleyayım sahəsindəki texnoloji yeniliklərlə geniş izləyici kütləsinin rəğbətini qazanmaqdan başqa Myvideo.az korporativ sektor üçün kanalların yaradılması xidmətlərini təqdim etməyə başlamışdır. İstənilən şirkət həmin kanal vasitəsilə öz istehlakçılarına yeni bir üsul vasitəsilə, yəni video ilə çata bilər. Bunun üçün şirkətlər istehlakçıların onların məhsullarını daha da yaxından öyrənə bilməsi üçün müxtəlif faydalı video-faylları yerləşdirə bilərlər.
Myvideo.az həmçinin mobil TV-tətbiqetmələrin, İPTV, peyk və kabel kanallarının yaradılması və irəlilədilməsi, beynəlxalq realiti-şou və televiziya layihələrinin istehsalı və lisenziyalarının alınması məsələlərində konsultasiya xidmətləri göstərir, müvafiq kontenti (bədii və televeziya filmləri, televerilişlər və s.) almağa yardım edir.
Yaradılmış şəffaf statistika sistemi internet-kanalını izləyən insanların dəqiq sayını göstərir və reklam verən şirkətlərə izləyicilərin sayı barəsində daha dürüst statistik məlumatları və müvafiq olaraq müxtəlif reytinqləri təqdim edir.
