Yüksək Texnologiyalar Parkının (YTP) Biznes İnkubasiya Mərkəzində fəaliyyət göstərən komandalardan biri olan “GR8CLUB” tərəfindən uğurlu bir layihə həyata keçirilir.
Belə ki, komandanın üzvü Coşqun Kərimovun müəllifliyi ilə “KVAN” adlı kitab hazırlanıb. Nəşrin əsas məqsədi gənclərimizi “Azərbaycan 2020: gələcəyə baxış” İnkişaf Konsepsiyasına uyğun çox məhsuldar və aktiv addımlar atmağa sövq etmək və onları cəmiyyətə maksimal xeyirli fərdə çevirməkdir.
İnformasiya-kommunikasiya sahəsində fəaliyyət göstərənlər və bu sahəyə marağı olan şəxslər üçün faydalı olacağı nəzərə alınaraq Rabitə və Yüksək Texnologiyalar Nazirliyi Yüksək Texnologiyalar Parkı tərəfindən kitabın çap olunmasına dəstək verilir. Bunun üçün müəllifə kitabın ilkin variantının yayımının “fərqli metodla” təqdim edilməsi təklif edilib.
Həmin təklifdən ilhamlanaraq müəllif “KVAN” kitabının “qərarların gücü”, “cəsarəti necə tapım?” və digər maraqlı mövzuları əhatə edən ilk 65 səhifəsini oxuculara ödənişsiz qaydada onlayn təqdim edib. Məlumat üçün bildirək ki, ilk 65 səhifəni www.kitabsiz.az ünvanından yükləmək olar.
Qeyd edək ki, “KVAN-a həyat ver” adı altında keçirilən onlayn kampaniya mart ayının əvvəlinə qədər davam edəcək.
Kampaniya çərşivəsində kitabın ilk hissəsini oxumuş və onu tam şəkildə əldə etmək istəyənlər əvvəlcədən sifariş yolu ilə nəşrin çap olunması üçün dəstək göstərmiş olacaq. Kitabı ödəmə terminalları vasitəsiylə ödəniş edərək əvvəlcədən sifariş etmək mümkündür.
Maraqlı məqam ondan ibarətdir ki, kitabı sirafiş edən şəxslərin və ya şirkətlərin adları kitabın “KVAN-a həyat vermişdilər” siyahısında qeyd ediləcəkdir.
Oxucuların istəyi ilə kitab 2 həftə ərzində tamamlanıb və artıq çapa hazırdır.
Kitabın “San-Fransisko” və “VitalCV” bölmələri müəllifin məhz Yüksək Texnologiyalar Parkında fəaliyyət göstərdiyi müddətdə yazılıb. Müəllif bu məkanın onun üçün yeni və məhsuldar ideyaların tədbiq olunmasında bir başlanğıc nöqtəsi olduğunu qeyd edib.
Kitab yerli oxucularla yanaşı, həmçinin Türkiyə, Rusiya, ABŞ və Avropa oxucularına da təqdim edilmək üçün tərcümə edilir.
“KVAN-a həyat ver” kampaniyası barədə daha ətraflı məlumatla facebook və twitter-də #kvanoxu “hashtag”ı vasitəsilə tanış olmaq olar.
