Nəqliyyat, Rabitə və Yüksək Texnologiyalar Nazirliyi həyata keçirdiyi sosial layihələrin davamı kimi Bakı şəhərində yerləşən 1 və 2 saylı uşaq evlərində yaratdığı kompüter sinfini yeni zəruri avadanlıqlarla təchiz edib.
Bundan başqa, 1 saylı uşaq evinin sakinləri üçün informasiya texnologiyalarının tədrisi üzrə kurslar təşkil edilib. Nazirliyin mütəxəssisləri tərəfindən kurslarda iştirak edən uşaqlara kompüterdə işləmək bacarığı, zəruri ofis və dizayn proqramları öyrədiləcək. Bu cür kurslar uşaqların informasiya texnologiyaları biliklərinə və yeni peşə vərdişlərinə yiyələnməsi baxımından əhəmiyyətlidir.
Xatırladaq ki, Heydər Əliyev Fondunun dəstəyi ilə Nazirlik tərəfindən Dünya Azərbaycanlılarının Həmrəylik Günü və Yeni il Bayramı münasibətilə valideyn himayəsindən məhrum olan uşaqların bilik və bacarıqlarının artırılması məqsədi ilə 1 və 2 saylı uşaq evlərinin hər birində kompüter sinfi yaradılıb.
