Samsung şirkəti bu yaxınlarda Galaxy S24 smartfon seriyası təqdim edəcək.Lakin şirkət öz əsas diqqətini smartfonlara deyil, onlarda olan süni zəka funksiyalarına ayıracaq. Samsung tədbir çərçivəsində mobil süni zəkanın yeni dövrünü sərgiləməyə hədəflənib. Mobil süni zəkanın yeni dövrü dedikdə nəyin nəzərdə tutulduğu barəsində bəzi məlumatları Samsung Electronics Mexico-nun Mobile eXperience şöbəsinin rəhbəri Rene Castillo təqdim edib. Samsung Mexico rəsmi saytında qeyd edilmiş məlumatda Castillo qeyd edib ki, AI Live Translate Call adlı funksiya sayəsində şirkətin yeni smartfonları istifadəçilərə fərdi tərcüməçini təqdim edəcəklər.
Bununla belə təqdim ediləcək tərcüməçi istənilən zaman istifadəçi üçün aktiv olacaq. “Digər dildə danışan insana zəng etmək və onun dediklərini anlamaq hər hansısa filmdə altyazının aktivləşdirilməsi qədər sadə olacaq. Hal-hazırda bu, elmi fantastika kimi səslənir. Lakin bu, yaxın zamanda Galaxy AI vasitəsilə reallığa çevriləcək” — deyə Rene Castillo qeyd edib. Onun sözlərinə əsasən bu yeni imkan smartfonlardakı Phone tətbiqinə inteqrasiya ediləcək. Funksiya həm mətnin həm də nitqin tərcüməsini mümkün edəcək. Mətn dedikdə çox güman ki, söhbət, mətn formatında olan mesajlardan gedir. Tərcümə prosesi isə real zaman ərzində baş verəcək.
