WABetaInfo yazır ki, “WhatsApp” tətbiqinin Android üçün 2.22.23.12 kodlu beta versiyasında şəxsi çatlarda sorğu keçirmək imkanı əlavə edilib. Əvvəllər WhatsApp testçiləri qrup çatlarının üzvləri üçün bu proqramda oxşar variant tapmışdılar. İndi şəxsi çatlarda sorğu keçirmək mümkün olacaq. Eyni zamanda, messencerin interfeysi və seçimləri qrup söhbətlərində olduğu kimi qalıb.
Qeyd etmək lazımdır ki, qrup və şəxsi söhbətlərdə sorğular şifrələnəcək və hətta proqramın yaradıcıları bu və ya digər cavabı seçmiş istifadəçiləri tanıya bilməyəcəklər. Yenilik hazırda beta sınaq mərhələsindədir. WhatsApp-ın stabil versiyasında bu funksiyanın buraxılış tarixi hələ açıqlanmayıb.
