“WhatsApp” tərtibatçıları istifadəçilərin uzun müddətdir gözlədiyi funksiyaları əlavə edərək, messencerin imkanlarını genişləndirməyə davam edir. Növbəti yeniliklər xidmətin müxtəlif Android cihazlarında bir hesab altında işləməsinə və qrup videozənglərinə aiddir.
“WhatsApp”ın beta versiyasında “Android” əməliyyat sistemi ilə işləyən smartfon və planşetdə messencerdən eyni vaxtda istifadə etmək mümkün olub. Bunun üçün planşetdə proqramı işə salmalı, sonra isə WhatsApp-ın quraşdırıldığı telefondan istifadə edərək ekranda görünən QR kodu skan etməlisiniz.
Daha iki yenilik isə videozəng funksiyası ilə bağlıdır. Məlum olduğu kimi, tərtibatçılar artıq 32 nəfərə qədər videokonfranslarda eyni vaxtda iştirak etmək imkanını sınaqdan keçirirlər. Hazırda iştirakçıların sayı cəmi səkkizlə məhdudlaşır. Qrup video zənglərinin pulsuz və heç bir məhdudiyyət olmadan əlçatan olması da vacibdir, məsələn, Zoom-da yalnız 40 dəqiqəyə qədər pulsuz söhbət edə bilərsiniz, Google Meet-də isə 60 dəqiqə.
İkinci dəyişiklik audio və ya video zəng üçün link yaratmağa və sonra onu lazımi insanlarla paylaşmağa imkan verən Zəng Bağlantıları funksiyası olacaq. Onlar zəngə avtomatik qoşulmaq üçün sadəcə mesajdakı linki klikləməlidirlər. “WhatsApp” hesabı olmayan şəxslərin konfransa qatılıb-qatılmayacağı hələlik bəlli deyil.
