Müasir innovasiyaların tətbiqi xərçəng xəstələrinin müalicəsində də mühüm rol oynayacaq. Bu sözləri Latviya Tibbi Təyinatlı İxrac Assosiasiyasının prezidenti Olafs Slutinş bu ölkənin iqtisadiyyat naziri Arvils Aşeradens ilə Yurmalada Qlobal Xərçəng Viroterapiyası Klinikasında görüşü zamanı deyib. O bu istiqamətdə Latviyanın dünyanın onkologiya mərkəzinə çevrilməsi üçün böyük potensialı və bütün imkanları olduğunu qeyd edib. Slutinş bildirib ki, istər Latviyada, istərsə də bütün dünyada güclü innovasiya olan viroterapiya başqa ölkələrin sakinlərini Latviyaya cəlb edərək, ölkənin qlobal miqyasda tanınmasına kömək etmək iqtidarındadır. O hesab edir ki, Latviya viroterapiyanın köməyi ilə ölkədə viroterapiya qədər nadir və keyfiyyətli olan digər tibbi xidmətlərdən də dünya səviyyəsində danışa bilərdi.
Qeyd edək ki, viroterapiya “Rigvir” (Riqa virusu) deyilən xüsusi onkolitik virusun köməyi ilə xərçəngin müalicəsi metodudur. Bu virus xərçəng şişinin bədxassəli hüceyrələrini taparaq məhv edir. Latviya Elmlər Akademiyası “Rigvir” virusunu Latviya elminin on ən böyük nailiyyətindən biri adlandırıb.
