Artıq 20-dən çox Avropa ölkəsinin istifadəçiləri Twitter Blue-a abunə olmaq imkanı əldə ediblər. Bu barədə TechCrunch resursu məlumat yayıb.
Yeni ölkələrə Hollandiya, Polşa, İrlandiya, Belçika, İsveç, Rumıniya, Çexiya, Finlandiya, Danimarka, Yunanıstan, Avstriya, Macarıstan, Bolqarıstan, Litva, Slovakiya, Latviya, Sloveniya, Estoniya, Xorvatiya, Lüksemburq, Malta və Kipr daxildir. Beləliklə, artıq dünyanın 35-dən çox ölkəsindən istifadəçilər abunə ola bilərlər.
Elon Musk-ın Twitter Blue-u birbaşa veb-interfeys vasitəsilə ödənildikdə ayda 8 dollara yüksəldi, App Store və Google Play vasitəsilə köçürmələr isə rüsumlar daxil olmaqla 11 dollara başa gəldi. Endirimli illik plan da mövcuddur – 84 dollar birbaşa və tətbiq mağazaları vasitəsilə 114 dollar.
Ödənişli abunəçilər 60 dəqiqəyə qədər video yükləmək, 4000 simvola qədər mesaj göndərmək və müzakirələrdə prioritet sıralama kimi bir çox üstünlüklər əldə edirlər. Sosial şəbəkənin yeni rəhbəri və sahibi İlon Mask Twitter Blue-nun platforma üçün əhəmiyyətli gəlir mənbəyi olacağını gözləyir. Hələlik bu ümidlər özünü doğrultmayıb – bəzi hesablamalara görə, platformanın cəmi 300 min abunəçisi var.
