ABŞ-ın “Information Technology and Innovation Foundation” analitik mərkəzinin mütəxəssisləri süni intellekt mövzusunda tədqiqat aparıblar. Nəticələrə görə,ABŞ yüz ballıq şkala əsasında 44,2 bal toplayıb, Çin 32,3 balla ikinci, Avropa İttifaqı isə 23,5 balla üçüncü yeri tutub.“ICTinfo.az” “lenta.ru” resursuna istinadən yazır ki,tədqiqatda əsas diqqət süni intellektin altı kateqoriyası üzrə 30 göstəriciyə yönəldilib: istedad, tədqiqat, işləmələr, tətbiq, məlumatlar və avadanlıq.Çinin süni intellekt imkanları Aİ və ABŞ ilə müqayisədə bir neçə istiqamət üzrə yaxşılaşıb. Birincisi, Çin 2018-ci ildə süni intellekt üzrə 24 929 tədqiqat işi dərc edərək Avropa İttifaqını süni intellekt nəşrləri üzrə dünya lideri kimi üstələyib. Aİ-də bu göstərici 20 418, ABŞ-da 16 233 təşkil edir. İkincisi, süni intellekt sahəsində tədqiqatların keyfiyyəti ümumilikdə ildən-ilə artır. Üçüncüsü, proqram təminatı və kompüter xidmətləri təqdim edən şirkətlər elmi tədqiqat və təcrübi-konstruktor işləri üçün xərcləri artırıblar.
