Şirkət rəsmi bloqunda Galaxy AI xüsusiyyətlərinin daşınan cihazlara ötürüldüyünü elan etdi. Bu barədə Samsung-un top meneceri Tae Mun Ro bildirib və o, həmçinin qarşıdan gələn yeniliklər haqqında ilk təfərrüatları açıqlayıb.
Nəşrin məlumatına görə, “Samsung” şirkəti “Galaxy Watch” smart saatı və “Galaxy Fit” fitnes-trekeri, gələcəkdə isə “Galaxy Ring” smart üzükləri üçün Galaxy AI xüsusiyyətlərini optimallaşdıracaq. Şirkət nümayəndəsi yeni süni intellekt imkanları əldə edəcək xüsusi cihazları sadalamayıb.
“Yaxın gələcəkdə seçilmiş Galaxy geyilən qurğular rəqəmsal sağlamlığı yaxşılaşdırmaq üçün süni intellektdən istifadə edəcək və qabaqcıl ağıllı sağlamlıq idarəçiliyi imkanlarının tamamilə yeni dövrünü açacaq. Samsung süni intellekt sahəsində daha aparıcı tərəfdaşlarla əməkdaşlıq edərək müxtəlif kateqoriyalar üzrə Galaxy AI imkanlarını zənginləşdirməyə və genişləndirməyə davam edəcək” – deyə Tae Mun Ro bildirib.
Bundan əlavə, yüksək səviyyəli icraçı bildirib ki, Galaxy AI platformasının hazırkı vəziyyəti “yalnız başlanğıcdır” və Galaxy S24-ü hazırlayarkən şirkətin hələ həyata keçirilməmiş bir çox ideya və konsepsiyaları var idi. O, həmçinin əlavə edib ki, zaman keçdikcə Galaxy cihazı istifadəçiləri bu ideyalar əsasında süni intellekt xüsusiyyətlərindən yararlana biləcəklər.
