“Qualcomm” və “Samsung” strateji tərəfdaşlıqlarını genişləndirdiklərini elan etdilər: Koreya elektronika nəhəngi onilliyin sonuna qədər amerikalı tərtibatçının texnologiyalarından istifadə edə biləcək, həmçinin öz məhsullarında Snapdragon prosessorlarından istifadəni davam etdirəcək. Bu barədə Qualcomm saytında məlumat verilib.
İki şirkət 3G, 4G, 5G və hətta 6G sahəsində patentləşdirilmiş həllərin istifadəsi ilə bağlı lisenziya müqaviləsinin 2030-cu ilin sonuna qədər uzadılması barədə razılığa gələ bilib. Qualcomm həmçinin Samsung-un Snapdragon prosessorlarının tədarükünü artıracaq ki, bu da Samsung Galaxy seriyalı cihazlarda, o cümlədən smartfonlar, planşetlər, fərdi kompüterlər, əlavə reallıq cihazları və digər qadcetlərdə istifadə olunacaq.
“Qualcomm” şirkətinin rəhbəri Kriştiano Amon lisenziya müqaviləsinin müddətinin uzadılmasının hər iki şirkətin uzunmüddətli əməkdaşlığa sadiqliyini göstərdiyini bildirib və 20 ildən artıqdır ki, birgə işlədiklərini xatırladıb. Samsung MX Business-in mobil bölməsinin rəhbəri Te Mun Roh (TM Roh) da iki şirkət arasında uzunmüddətli strateji tərəfdaşlığı qeyd edib və amerikalı tərtibatçının işini yüksək qiymətləndirib. Onun fikrincə, “Qualcomm-un innovativ texnologiyaları mobil sənayenin inkişafında aparıcı rol oynayıb”.
