COP29 tədbiri çərçivəsində “Qitələri Birləşdirən Yol: İpək Yolu Boyunca Davamlı Nəqliyyat və Logistika – Avropa və Latın Amerikası” mövzusunda tədbir keçirilib.
Tədbirdə rəqəmsal inkişaf və nəqliyyat nazirinin müavini Rəhman Hümmətov iştirak edib.
Paneldə İpək Yolunun tarixi izləri üzərində inşa edilən Orta Dəhlizin əhəmiyyəti və dayanıqlılığının artırılması istiqamətində yerli və beynəlxalq səviyyədə görülən işlər müzakirə edilib, Dəhlizin yükaşırma gücünün ilbəil artdığı qeyd olunub. Həmçinin ölkədə nəqliyyat infrastrukturunun yenilənməsi, əməliyyatların səmərəliliyinin yüksəldilməsi, innovativ rəqəmsal həllərin tətbiqi istiqamətində görülən işlər və nəticələri barədə məlumat verilib.
Eyni zamanda Bakı Beynəlxalq Dəniz Ticarət Limanının genişləndirilməsi, “Silkway Cargo Village” kimi beynəlxalq əhəmiyyətli layihələrin icrasından sonra ölkəmizin, həmçinin Latın Amerikası və Asiya arasında yüklərin daşınmasında tranzit qovşağı kimi mühüm rol oynamaq potensialına malik olduğu vurğulanıb.
Tədbir tarixi İpək Yolunun modernləşdirilməsi, dayanıqlılığının artırılması və regional əlaqələrin gücləndirilməsi istiqamətində atılan addımların əhəmiyyətini bir daha nümayiş etdirib.
