Dekabrın 8-də Bakı Ekspo Mərkəzində XXIII Azərbaycan Beynəlxalq Telekommunikasiya və İnformasiya Texnologiyaları (“Bakutel-2017”) sərgi və konfransı işini başa çatdırıb. Xəzər regionunda sərgi sənayesinin ən böyük tədbiri olan “Bakutel-2017” sərgisi fikir mübadiləsi, işgüzar əlaqələrinin genişləndirilməsi, eləcə də qabaqcıl texnoloji nailiyyət və yeniliklərlə tanışlıq üçün əlverişli şəraiti təmin edib.
Dünyanın 20 ölkəsini təmsil edən təxminən iki yüz iştirakçı şirkəti birləşdirən bu sərginin keçirilməsi bir neçə mühüm göstəriciləri ilə xarakterizə olunur. “Bakutel-2017” sərgisi və sərgiyə həsr olunmuş tədbirlər müxtəlif ölkələrdən gəlmiş qonaqları, nazirləri, alimləri, iş adamlarını və beynəlxalq rəsmiləri bir araya toplayıb.
Bu barədə sərginin təşkilatçısı olan “Caspian Event Organisers” şirkətindən məlumat verilib. Qeyd olunub ki, sərgi Azərbaycana sürətlə artan marağın fonunda iştirakçı ölkələr arasında qarşılıqlı faydalı əməkdaşlığın daha da möhkəmlənməsinə mühüm töhfə verib. Sənaye peşəkarlarını konfrans, seminar və görüşlərdə bir araya gətirən sərginin işgüzar proqramı tədbirin elmi-praktik əhəmiyyətini artırır.
Milli stendlərin dolğunluğu sərgiyə dövlət səviyyəsində artan xarici marağı göstərir. Bu gün bir çox ölkələr Azərbaycanı strateji perspektivli tərəfdaş hesab edir, yerli bazar isə çoxtərəfli biznes üçün uğurlu platformadır.
“Bakutel-2017” sərgisinin öz ixtira, proqram və xidmətləri haqqında məlumat vermək istəyən gənc şirkətləri layihəyə cəlb etmək ənənəsini davam etdirir. Regionun İKT sektoru üzrə ən böyük tədbiri çərçivəsində startap şirkətlərə böyük diqqət yetirilir. Sənaye liderləri və dövlət strukturları ilə birlikdə sərgidə iştirak edən bir sıra perspektivli debütant öz layihələrini təqdim edib. Bu təmayül startapları öz qruplarına daxil edən xarici iştirakçılar üçün də səciyyəvi olub.
Sərgi çərçivəsində sayı 6 mindən çox olan ziyarətçi gələcəkdə gündəlik həyatımıza daxil olacaq texnologiyalara böyük maraq göstəriblər.
Beləliklə, sərgi informasiya əsrinin növbəti vektorunu müəyyənləşdirməklə yanaşı, müasir texnologiyaların inkişafı ilə bağlı ictimai rəyin göstəricisinə çevrilib.
“Caspian Event Organisers” şirkətindən bildirilib ki, növbəti “Bakutel” sərgisi 2018-ci il dekabrın 4-7-də keçiriləcək.
