“Nar” şirkəti bu ilin 12-22 may tarixlərində ölkəmizdə keçiriləcək Bakı 2017 IV İslam Həmrəyliyi Oyunlarının rəsmi telekommunikasiya tərəfdaşı seçildi.
Rəsmi tərəfdaşlığa dair saziş hər iki şirkət rəsmilərinin iştirakı ilə imzalanıb. “Nar” Bakı 2017 IV İslam Həmrəyliyi zamanı Oyunların Əməliyyat Komitəsini mobil telekommunikasiya xidmətləri – zəng və data xidmətləri ilə təmin edəcək, eləcə də İnformasiya Əlaqə Mərkəzi və Oyunların Texnologiya Şöbəsinə dəstək xidməti sahəsində aparıcı provayder rolunu oynayacaq.
Bakı 2017 IV İslam Həmrəyliyi Əməliyyat Komitəsinin korporativ direktoru Elçin Səfərov: “Azərbaycanda uzun illərdir ki, uğurla fəaliyyət göstərən və böyük abunəçi sayına məxsus olan “Nar” şirkəti Bakı 2017 IV İslam Həmrəyliyi Oyunlarının rəsmi telekomunikasiya dəstəkçisi seçilmişdir. Oyunlar zamanı yüksək keyfiyyətli rabitə xidmətləri ilə təmin olunmaq çox vacibdir. Əminəm ki, birgə əməkdaşlığımız sayəsində “Nar” şirkəti Bakı 2017 IV İslam Həmrəyliyi Oyunlarının uğurla həyata keçirilməsində öz müsbət töhfəsini verəcək.”
“Nar”-ın baş icraçı direktoru Klaus Müller “Nar”-ın Bakı 2017 IV İslam Həmrəyliyi Oyunlarının rəsmi telekommunikasiya tərəfdaşı seçilməsini şirkət üçün böyük qürur hissi adlandırıb. Klaus Müller: “İki il öncə Azərbaycanda keçirilmiş ilk Avropa Oyunlarının tərəfdaşı olaraq, bu səpkili mühüm layihələrdə birgə əməkdaşlıq istiqamətində kifayət qədər təcrübə qazanmışıq. 
Bu təcrübəyə əsaslanaraq deyə bilərəm ki, layihənin telekommunikasiya tərəfdaşı olaraq, “Nar”-ın peşəkar əməkdaşları Bakı 2017 Oyunlarının təşkilatçılarına və iştirakçılarına yüksək keyfiyyətli xidmət göstərəcək. Əminəm ki, Azərbaycanın tarixində Bakı 2017 IV İslam Həmrəyliyi Oyunları çox böyük hadisə olacaq və “Nar” şirkətinin bu hadisənin bir parçası olması bizə qürur verəcək.
Xatırladaq ki, Bakı 2017 İslam Həmrəyliyi Oyunları 2017-ci il may ayının 12-22 tarixlərində Bakı, Azərbaycanda keçiriləcək İslam dünyasını birləşdirən maraqlı, multi-idman tədbiridir.
Müsəlman ölkələrindən gələn idmançılar yarışın 10 günü ərzində öz ölkələrini 20 müxtəlif idman növləri üzrə 23 kateqoriyada (Atletika və Para Atletika, Su İdmanı Növləri — Suya tullanma, Su idman növləri — Üzgüçülük, Su İdmanı Növləri -Vaterpolo, 3×3 Basketbol, Futbol, İdman gimnastikası, Bədii gimnastika, Uşu, Stolüstü Tennis, Həndbol, Cudo və görmə qabiliyyəti olmayanlar üçün cudo, Yunan-Roma güləşi, Sərbəst güləş, Atıcılıq, Tennis, Voleybol, Boks, Zorxana, Karate, Taekvondo, Ağır atletika) Bakıda yerləşən 16 müasir yarış meydanlarında təmsil edəcəklər.
Azərbaycanın paytaxtı Bakı şəhəri 2013-cü ilin iyulunda Ciddədə İslam Həmrəyliyi İdman Federasiyasının (ISSF) Baş Assambleyasında Oyunların ev sahibliyinə layiq görülmüşdür.
İslam Həmrəyliyi Oyunlarının Təşkilat Komitəsi Azərbaycan Respublikasının Prezidenti cənab İlham Əliyevin fərmanı ilə yaradılıb. Fərmana əsasən, Azərbaycanın Birinci Vitse-Prezidenti Mehriban xanım Əliyeva dördüncü İslam Həmrəyliyi Oyunlarının Təşkilat Komitəsinin Sədri təyin edilmişdir. Azərbaycan İslam Həmrəyliyi Oyunları Əməliyyatlar Komitəsi (AİHOƏK) İHİF ilə əməkdaşlıqda Oyunları təşkil və tətbiq edəcək.
