Naxçıvan Muxtar respublikasının mövcud telekommunikasiya şəbəkəsinin əsasını təşkil edən fiber-optik şəbəkə vasitəsilə bütün yaşayış məntəqələrinə və qurumlara kəsintisiz rabitə və internet xidmətləri təqdim olunur.
Fiber-optik xətlər üzərindən təmin edilən GPON texnologiyası əsasında cari ilin doqquz ayı ərzində həyata keçirilən “Evədək optika” layihəsi çərçivəsində 49 abonentə fiber-optik xətlər çəkilib, zəruri avadanlıqlar quraşdırılıb.
Həmçinin, cari ilin müvafiq dövrü ərzində Naxçıvan şəhəri ilə yanaşı, muxtar respublikanın rayon mərkəzlərində və kəndlərində də bir sıra qurumlara fiber-optik xətt çəkilişi həyata keçirilib, istismar müddəti ərzində fiber-optik xətt sahəsində yaranmış nasazlıqların aradan qaldırılması istiqamətində mühəndislər tərəfindən operativ tədbirlər görülüb.
Bunlarla yanaşı, cari ilin yanvar-sentyabr ayları ərzində muxtar respublikada 1263 abonent yeni stasionar telefon xətti ilə, 3234 abonent isə genişzolaqlı internetlə təmin olunub.
