Bu gün 2 mindən çox namizəd arasında seçilmiş, Azərbaycan Kibertəhlükəsizlik Mərkəzində təhsilə qəbul olunmuş 60 tələbənin “Məzun günü”nə toplaşmışıq. Onların bir çoxu artıq işlə təmin olub. Bu isə o deməkdir ki, əmək bazarında onlara çox böyük ehtiyac var.Bunu İnnovasiya və Rəqəmsal İnkişaf Agentliyinin sədri İnarə Vəliyeva jurnalistlərə açıqlaması zamanı deyib.
Onun sözlərinə görə, Azərbaycan Kibertəhlükəsizlik Mərkəzinin bundan öncəki buraxılışlarının məzunları bu gün bir çox böyük şirkətlərdə fəaliyyət göstərirlər, bununla yanaşı onlar AKM-də mütəxəssis və mentor kimi çalışırlar.
“Bunun öz üstünlüyü var. Çünki onlar öz bilik və təcrübələrini yeni tələbələrlə bölüşürlər. Bu gün biz eyni zamanda AKM-nin 4-cü dalğa tələbələrinə xoş gəldin deyirik. Mərkəzdə artıq növbəti 60 nəfər təhsilinə başlayıb. AKM-nin əsas rolu kibertəhlükəsizlik üzrə mütəxəssislər yetişdirməkdir. Onlar təcrübədə bir çox bilikləri əldə edirlər. Bu, onlar üçün çox böyük üstünlükdür. Bizim tələbələr və məzunlar yerli kibertəhlükəsizlik məhsulları üzərində işləyirlər. Onlar kibertəhdidləri analiz edərək yerli kiber məhsullar yaradırlar“, — deyə İnarə Vəliyeva bildirib.
