“Apple” üç nanometrlik prosessor əsasında smartfon buraxan ilk şirkət olacaq. Bu barədə “Nikkei” məlumat yayıb.
Agentlik jurnalistləri məsələ ilə tanış olan üç mənbəyə istinad edib. İnsayderlərin açıqlanan məlumatlarına görə,”iPhone 15 Pro” və “15 Pro Max” smartfonları üç nanometrlik texnologiyadan istifadə etməklə hazırlanmış çipləri qəbul edə bilir. Yeni smartfonlar üçün prosessorlar TSMC tərəfindən hazırlanacaq.
Mənbələr bildiriblər ki, “A17 Bionic” çipləri hazırda “Apple”-ın Asiya tərəfdaşı tərəfindən sınaqdan keçirilən TSMC N3E texnologiyasından istifadə edilməklə hazırlanacaq. İstehsalın 2023-cü ilin ikinci yarısında başlaması planlaşdırılır. Yeni prosessorlara əsaslanan flaqman cihazların payıza qədər hazır olacağı gözlənilir.
Mütəxəssislər hesab edirlər ki, yeni üç nanometrlik çip smartfonların gücünü və enerji səmərəliliyini artıracaq. Həmçinin oxşar standarta uyğun olaraq “Mac” kompüterləri üçün “M” xətt prosessorlar hazırlanacaq. İnsayderlər təsdiqləyiblər ki, yalnız ən bahalı flaqman “iPhone 15 Pro” və “15 Pro Max” “A17 Bionic” alacaq. Göründüyü kimi, iPhone 15 və iPhone 15 Plus A16 prosessoru ilə qalacaq.
Sentyabrın əvvəlində nüfuzlu insayder Ming-Chi Ko bildirmişdi ki, “Apple” bundan sonra sərfəli və bahalı smartfonlar arasında fərq qoyacaq. Ən yaxşı qurğular premium xüsusiyyətləri – güclü prosessor, təkmilləşdirilmiş kamera, ən keyfiyyətli korpus materialları alacaq.
