İnnovasiya və Rəqəmsal İnkişaf Agentliyinin təşəbbüsü ilə nüfuzlu təhsil müəssisələrindən biri olan “Harbour.Space” Universiteti Azərbaycanda İKT sahəsində yüksəkixtisaslı mütəxəssislərin hazırlanması məqsədilə «DigiRise» proqramına start verib. Artıq sözügedən proqramın ikinci dalğasına qeydiyyat başlayıb.
Proqram süni intellekt və proqram mühəndisliyi üzrə ixtisaslaşmış kiçik və orta səviyyəli mütəxəssislərin hazırlığı və ixtisasartırması prosesini hədəfləyir.
«DigiRise» proqramına “Modern Software Architecture”, “Software Development Lifecycle” və “Mathematical Foundations of Machine Learning” biliklərinə malik olan proqram təminatı sahəsində 1-3 il təcrübəsi olan şəxslər müraciət edə bilərlər.
Təlimlər gündə 2 saat olmaqla, həftədə 4 dəfə axşam saatlarında ingilis dilində tədris olunacaq. Dərslərin axşam saatlarında olması işləyən şəxslərin də rahatlıqla sözügedən təlimlərdə iştirakına imkan yaradacaq.
Namizədlər ilkin texniki bacarıqları, karyera yüksəliş imkanları və motivasiyalarına görə xüsusi meyarlarla müəyyən ediləcək. Tamamilə ödənişsiz olan «DigiRise» proqramı real iş ehtiyaclarına uyğunlaşdırılmış unikal “İş və təhsil” modelini təqdim edir. Tələbələr seçilmiş “Capstone” layihələri üzərində işləyərək rəqəmsal transformasiya bacarıqlarını real dünya şəraitində inkişaf etdirəcəklər. Təlim prosesində tələbələr mentor dəstəyi təmin olunacaqlar.
Seçim mərhələrindən uğurla keçən 15 nəfər proqramda iştirak haqqı qazanacaq.
Qeyd edək ki, aprel ayında başlayacaq təlimlər onlayn və oflayn şəkildə olmaqla 6 ay davam edəcəkdir.
Proqramda iştirak üçün qeydiyyat linki: https://harbour-space.typeform.com/to/vbW6Vijl
Son müraciət tarixi: 30.03.2025-ci il
«DigiRise» proqramı Azərbaycan gənclərinin İKT sahəsində yüksək bilik və bacarıqlar qazanması üçün əhəmiyyətli addım olmaqla yanaşı, ölkədə rəqəmsal transformasiya prosesinə dəstək verəcək.
