Beynəlxalq Data Korporasiyası (IDC) bu ilin ikinci rübündə qlobal planşet bazarı üzrə araşdırmanın nəticələrini dərc edib. Hesablamalara görə, tədarüklər 2021-ci ilin ikinci rübü səviyyəsində qalıb.
Aprel-iyun ayları daxil olmaqla, bütün dünyada təxminən 40,5 milyon qurğu satılıb. Müqayisə üçün: bir il əvvəl tədarüklər 40,4 milyon ədəd idi. Beləliklə, IDC çox cüzi artım qeydə alıb – təxminən 0,15%.
Analitiklər qeyd edirlər ki, ötən rübdə tədarüklər gözləntiləri üstələyib. Bu qismən Çin tədarükçüləri “Xiaomi”,”Oppo”, “Vivo” və “Realme” tərəfindən cihazlara yaxşı tələbatla bağlıdır.
Qlobal planşet bazarının ən böyük oyunçusu təxminən 31,0% balla “Apple” şirkətidir. İkinci yerdə 18,1 faizlə “Samsung”, ilk üçlüyü isə 13,6 faizlə “Amazon” qapayır. İlk beşliyə sənayenin müvafiq olaraq 8,7% və 5,3%-nə nəzarət edən “Lenovo” və “Huawei” də daxil idi. Bütün digər oyunçuların ümumi payı 23,3% təşkil edib.
Qeyd olunur ki, illik müqayisədə planşetlərin tədarükü üzrə sadalanan tədarükçülər arasında yalnız “Amazon” 26,9% artıra bilib. İlk beşliyə daxil olan bütün digər şirkətlər qırmızı xəttə idi.
