«Samsung» şirkətinin «Galaxy Note 8» yeni və gözlənən smartfonunun nümayişi Almaniyada keçiriləcək sərgidə deyil, Nyu-Yorkda təqdim ediləcək .Smartfonun satış startı sentyabra planlaşdırılmışdır. ABŞ bazarında qurğunun qiyməti 900 dollar təşkil edəcək. «Ictinfo.az» «actualnews.org»-a istinadən bildirir ki,»Samsung» şirkət nümayəndələri rəsmən informasiyanı təsdiq etdilər.
İlkin məlumata görə, “Samsung Galaxy Note 8” əvvəlki modellə müqayisədə daha böyük ekranla (6,3 düym diaqonallı), eləcə də tərəflərinin nisbəti 18.5:9 ölçülü “Quad HD+” (2960 x 1440 piksel) təsvir ölçüsünə malik “Infinity Display” ekranla təchiz ediləcək. Qurğunun əsasını “Qualcomm Snapdragon 835” (və ya Snapdragon 836) yaxud “Exynos 8895” prosessorları, 6 giqabaytlıq operativ və 256 giqabaytadək quraşdırılmış yaddaş təşkil edəcək.
“Galaxy Note 8” Cənubi Koreya istehsalçısının ilk ikikameralı smartfonu ola bilər. Qurğunun kamerası 12 meqapikselli enlibucaqlı modula və 13 meqapikselli telefoto moduluna malik olmaqla birlikdə üçqat optik zummeri təmin edəcək. Qeyd edək ki, “iPhone 7 Plus” modeli də analoji konstruksiyaya malikdir. Bundan əlavə, akkumulyator tutumu 3300 milliamper/saata bərabər olacaq smartfon “Android 7.1.1 Nougat” əməliyyat sisteminin idarəetməsi ilə işləyəcək.
