Cənubi Koreyanın “Samsung” şirkətinin amerikalı rəqibi “Apple”dan qabağa düşmək üçün operativ şəkildə istehsal edib, “iPhone 7”dən əvvəl bazara çıxardığı “Galaxy Note 7” ilə bağlı insidentlər davam edir.Sinqapurdan Hindistana uçan, “İndiGo” Hava Yollarına məxsus sərnişin təyyarəsində “Galaxy Note 7” smartfonu alışıb. Sinqapur-Çennai reysi ilə hərəkət edən təyyarənin sərnişinlərindən biri içində smartfon olan çantasını təyyarədə əl baqajlarının yerləşdirildiyi dolaba qoyub. Bir qədər sonra dolabda tüstülənmə başlayıb. Dolabı açan stüardessalar “Galaxy Note 7”nin tüstüləndiyini və smartfondan qığılcımlar çıxdığını görüblər. Yanğın böyümədən söndürülüb. Təyyarə normal qaydada yerə enib.“Samsung”dan bildiriblər ki, hadisə araşdırılır və aviaşirkətlə əlaqə saxlanacaq.
Xatırladaq ki, “Galaxy Note 7” satışa çıxarıldıqdan bəri smartfonun öz-özünə alışması və partlaması ilə bağlı çoxlu sayda hadisə baş verib. Nəticədə “Samsung” satılan bütün smartfonları təhvil alaraq yeniləri ilə dəyişdirməyə qərar verib. Artıq Cənubi Koreyada 200 mindən çox müştərinin smartfonları dəyişdirilib. Ümumilikdə ölkədə 429 min ədəd “Note 7” satılıb.
