«Facebook» şirkəti bu gündən «iPhone» və «iPad» qurğularında «Messenger» proqramı üçün biometrik eyniləşdirmə funksiyasını təqdim edib. «Android» sistemi üçün isə yenilik yaxın aylarda reallaşdırılacaq.»ICTinfo.az» «hightech.fm» saytına istinadən yazır ki, «Facebook» 2020-ci ilin əvvəlində «Messenger»də bloklama funksiyasının sınaqdan keçirildiyini təsdiq edib. Sosial şəbəkənin nümayəndələri əmindirlər ki, bu funksiya sayəsində istifadəçilər öz yazışmalarının təhlükəsizliyi haqqında narahat olmadan telefon və ya planşetlərini dostlarına və ya ailələrinə verə biləcəklər. Bir il bundan əvvəl «Facebook», həmçinin «WhatsApp» messenceri üçün biometrik blokdan çıxarma funksiyasını tətbiq edib.Yeni funksiyanı aktivləşdirmək üçün «Məxfilik» bölməsinə daxil olmaq, sonra lazımi seçimi seçib «App Lock» funksiyasını aktiv etmək lazımdır. «Messenger» proqramından çıxdıqdan 1 dəqiqə, 15 dəqiqə və ya 1 saat sonra «App Lock» funksiyasını aktivləşdirmək olar.
2021-ci ildə sosial şəbəkə «Messenger»də «End-to-end encryption» şifrləməsini tətbiq edəcək. Hələ ki bunun üçün istifadəçilər xüsusi məxfi çat yaratmağa məcburdurlar.
