4 fevral 2016-cı il tarixində bəzi kütləvi informasiya vasitələrində Əmək və Əhalinin Sosial Müdafiəsi Nazirliyinin (ƏƏSMN) «Elektron hökumət» portalına inteqrasiya edilmiş 13 xidmətindən hazırda yalnız 5 elektron xidmətinin işlək olduğu haqqında məlumat yayılıb.
Bununla əlaqədar «Elektron hökumət” portalının operatoru Rabitə və Yüksək Texnologiyalar Nazirliyinin Məlumat Hesablama Mərkəzi bildirir ki, bu qurumun təqdim etdiyi mövcud e-xidmətlərdən bir qisminin aktiv olmaması ƏƏSMN-də aparılan islahatlarla bilavasitə bağlıdır. Aparılan yeni islahatlara uyğun olaraq həmin xidmətlər üzərində vətəndaşların daha asan və rahat formada istifadəsinə uyğunlaşdırılması üçün texniki təkmilləşdirmə işləri aparılır.
Hazırda ƏƏSMN-nin «Elektron hökumət» portalı üzərindən təqdim etdiyi 7 elektron xidmət tam şəkildə işləkdir və vətəndaşların istifadəsindədir. Qeyd edək ki, təkcə yanvar ayı ərzində qurumun təqdim etdiyi 7 xidmətə 174708 dəfə müraciət edilib.
Xatırladaq ki, ƏƏSMN-i «Elektron hökumət» portalı üzərindən aşağıdakı 7 adda elektron xidmətləri təqdim edir:
İş yerinə dair arayış
- Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi
- Əmək müqaviləsi bildirişləri barədə məlumatların işçilər tərəfindən əldə edilməsi
- İşsizlik müavinətinin məbləğinin hesablanması kalkulyatoru
- Sosial müavinətlərin və təqaüdlərin hesablanması üzrə sosial kalkulyator
- Tibbi-Sosial Ekspert Komissiyaları tərəfindən keçirilmiş müayinə barədə məlumatın verilməsi
- Tibbi-Sosial Ekspert Komissiyasında sonuncu müayinəyə dair məlumatın verilməsi.
