«Bakcell» Qəbələdə jurnalistlər üçün seminar keçirir

Azərbaycanın ilk mobil operatoru və aparıcı mobil internet provayderi «Bakcell» şirkəti 25-27 noyabr tarixlərində jurnalistlər üçün növbəti seminar təşkil edib.Bu dəfə jurnalistlərdən ibarət qrup Qəbələdə yerləşən “Qafqaz Resort Hotel” kompleksində toplaşıb. Seminarın məqsədi informasiya və kommunikasiya texnologiyaları, həmçinin ümumilikdə mobil telekommunikasiya haqqında jurnalistlərin məlumatlılığının artırılmasıdır.

«Bakcell» şirkətinin Məhsulun inkişafı üzrə meneceri Şamil Həsənov seminar iştirakçılarına korporativ seqmenti əhatə edən «Bakcell Biznes» barədə ətraflı məlumat verib. Sonra şirkətin Mobil internet üzrə yarımbölmə rəhbəri Hassan Şahid “Cəlbedici mobil həllər və təkliflər” mövzusunda mühazirə ilə çıxış edib.

Daha sonra şirkətin Müştəri Xidmətləri Departamentinin əməkdaşı Emin Əsgərsoy “Təmas nöqtələrində müştəri davranışı” mövzusu üzrə seminar iştirakçıları qarşısında təqdimat keçirib.

Seminarın ikinci günündə tədbir iştirakçıları üçün daha bir neçə mövzuda təqdimatlar təşkil olunacaq. Belə ki, “Bizimlə səyahət edərkən fərqi hiss edin” mövzusunda «Bakcell» şirkətinin Klass və Rouminq bölməsinin rəhbəri Anar Qurbanov media nümayəndələrinə ətraflı məlumatlar verəcək. Daha sonra “Mobil telekommunikasiyada qlobal trendlər — İT və Texnologiya” mövzusu ilə  şirkətin İKT layihələrinin idarə edilməsinin biznes analizi üzrə baş mütəxəssisi Orxan Bədəlov çıxış edəcək. O. Bədəlov həmçinin “Mobil internet penetrasiyası. “Bakcell”in mobil interneti. Ən yaxşı 4G təcrübə — İT və Texnologiya” mövzusunda da mühazirə deyəcək.

Qeyd edək ki, «Bakcell» şirkətinin jurnalistlər üçün keçirdiyi bu seminar artıq üçüncü ildir təşkil edilir.